ओलम्पियन नयनाका दम्पती र छोरालाई कोरोना संक्रमण

काठमाडौं (हाम्रो खेलकुद) – ओलम्पियन पौडीवाज नयना शाक्यसँगै उनको परिवारलाई नै कोरोना भाइरसको संक्रमण पुष्टि भएको छ ।

नयनाले मंगलबार सामाजिक सञ्जाल फेसबुकबाट आफु र परिवारलाई कोरोनाको संक्रमण देखिएको लेखेकी छन् । नयनासँगै उनका पति पूर्व बास्केटबल खेलाडी बिकास शाही र छोरा इभानलाई कोरोना देखिएको हो ।

आफ्नो घरमा रहेको एक स्टोरका सञ्चालकलाई कोरोना देखिएपछि कन्ट्याक्ट ट्रेसिङमा परेपछि स्वाव संकलन गरिदा शुरुमा कोरोना नदेखिएपनि शंक लागेर पुनः स्वाव संकलन गर्दा परिवारलाई कोरोना देखिएको नयनाले फेसबुकमा लेखेकी छिन् ।

१३ औं दक्षिण एसियाली खेलकुद (साग) मा नेपाली महिला टोलीलाई रजत पदक दिलाएका प्रशिक्षक विकासलाई केहि दिनपछि कोरोनासँग मिल्ने लक्षण देखिएपछि परिक्षण गर्दा कोरोना रिपोर्ट पोजेटिभ आएको उनले लेखेकी छिन् ।

आठौं सागको स्वर्ण विजेता नयनाले धेरै सावधानी अपनाएर घरमै बस्दा समेत कोरोना देखिएको बताउदै भाईरसलाई हल्का रुपमा नलिन आग्रह समेत गरेकी छिन् ।

उनीहरु सबैजना अहिले चिकित्सककै सल्लाहमा सावधानी अपनाएर घरमै सेल्फ आइसोलेसनमा बसिसकेका छन् ।