काठमाडौं (हाम्रो खेलकुद) – बागमती प्रदेश पर्वतीय खेलकुद महासंघको कार्यसमिति बैठकले बार्षिक कार्य योजना तयार पारेको छ । भर्चुअलमार्फत बसेको बैठकले बार्षिक कार्ययोजना पारित गरेको हो ।

बैठकले गत आर्थिक वर्षको कार्यक्रमको समिक्षा, आर्थिक प्रतिबेदन तथा सदस्य संघहरुको गतिविधि सम्बन्धि प्रस्ताव पारित गर्दै नयाँ ऐन अनुसार नेटवर्कको नाम परिवर्तन गरि ‘बागमती प्रदेश पर्वतीय खेलकुद महासंघ’ को रुपमा लैजाने निर्णय समेत गरेको छ ।

प्रदेश सभा सदस्य रिना गुरुङले पर्यटकीय खेलकुद सम्बन्धि आवश्यक नीति निर्माणमा सहयोग गर्ने प्रतिबद्धता ब्यक्त गर्दै चितवन साहसिक तथा पर्यटकीय खेलकुदको हब बन्न सक्ने धारणा राखेकी थिइन् ।

महासंघका अध्यक्ष तथा राखेपका सदस्य गोविन्द प्रसाद भट्टराईले हालै जारि भएको खेलकुद सम्बन्धि ऐनले यस क्षेत्रमा केहि उत्साह थपिने बिश्वास व्यक्त गर्दै नयाँ खेलकुद विकास ऐन, राष्ट्रिय खेलकुद परिषद तथा महासंघको सम्भावित गन्तब्यको बारेमा प्रष्ट पारेका थिए ।

बैठकले पर्यटकीय, साहसिक तथा परम्परागत खेलको अध्ययन र प्रतियोगिताहरु अगाडी बढाउने, खेलकुद, पर्यटन, संस्कृति, वातावरण तथा महिला र यूवा शसक्तिकरण जस्ता क्षेत्रमा बागम्ती प्रदेश तहका सरकारी, गैरसरकारी संघसंस्था र निकायहरुसंग सहकार्य गर्ने निर्णय गरेको छ ।

प्रदेश महासंघको कार्यालय हेटौडामा राख्ने र निकट भविष्यमै आवश्यक सांगठनिक संरचनाहरुको सुधार तथा निर्माण गर्ने निर्णय बैठकले गरेको छ ।