एजेन्सी – बेलायती नम्वर एक एन्डी मर्रेले पूनरागमन जित निकाल्दै युएस ओपन टेनिसको दोस्रो चरणमा प्रवेश गरेका छन् ।

३३ वर्षीय मर्रेले जापानी योसीहितो निसीओकासँग शुरुवाती दुई सेट गुमाएपनि उत्कृष्ट पूनरागमन गर्दै ३–२ को जित निकाल्दै दोस्रो चरणमा प्रवेश गर्न सफल भएका हुन् । न्युयोर्कस्थित आर्थर एसे स्टेडियममा मंगलबार राति भएको दर्शकविनै जारी रहेको खेलमा मर्रेले पहिलो र दोस्रो सेट समान ४–६ र ४–६ ले गुमाएको थियो ।

५९६ दिनपछि पहिलोपटक ग्रान्डस्लाममा प्रतिस्पर्धा गरेका मर्रेले त्यसपछि उत्कृष्ट पूनरागमन गर्दै तेस्रो सेट ७–६ ले जित्दै खेलमा फर्कने संकेत दिएका थिए । त्यसपछि चौथो सेट पनि समान ७–६ ले जित्दै सेटलाई २–२ को बराबरी गर्न सफल भएका थिए ।

निर्णायक सेट मर्रेले ६–४ ले आफ्नो पक्षमा पार्दै खेल ३–२ ले आफ्नो पक्षमा पार्न सफल भयो ।
मर्रेले विश्व नम्वर ४८ माथि जित निकाल्न झन्डै ५ घन्टा समय खर्चिएका थिए । मर्रेले पछिल्लोपटक अगस्ट २०१९ मा विम्वल्डनमा प्रतिस्पर्धा गरेका थिए । त्यसयता उनी मैदान बाहिर रहेका थिए ।

यस्तै महिलातर्फ अमेरिकी सेरेना विलियम्सले आफ्नै देशकी क्रिस्टी एनमाथि ७–५ र ६–३ को सोझो सेटमा जित निकाल्दै अर्काे चरणमा प्रवेश गरेकी छिन् ।