काठमाडौं (हाम्रो खेलकुद) – नेपाली युवा ब्याडमिन्टन खेलाडी सानिया चन्दले युनाइटेड अरब इमिरेट्स (युएई) मा भएको एयर ब्याडमिन्टन च्याम्पियनसिप अन्तरगतको महिला एकलतर्फको उपाधि जितेकी छन् ।

बिहीबार राति काइट बिच दुवईमा भएको फाइनलमा सानियाले भारतीय खेलाडी सान्द्रा सातेसानलाई २–१ को सेटमा पराजित गर्दै उपाधि जितेकी हुन् । सानियाले पहिलो सेट ७–१५ ले गुमाएपनि त्यसपछिको दुवै सेटमा १५–११ र १५–९ को सहज जित निकाल्दै च्याम्पियन बन्न सफल भइन् ।

सानिया दुवई स्पोर्ट्स काउन्सिलद्धारा आयोजित एयर ब्याडमिन्टन च्याम्पियनसिपको उपाधि जित्ने पहिलो नेपाली खेलाडीसमेत बनेकी छिन् ।
मिक्स डबल्र्समा फाइनलमा प्रवेश गरेपनि सानियाका आफ्नै भई अस्वस्थ रहेका कारण फाइनल गुमाउन सक्ने सानियाका प्रशिक्षक तथा उनकै काका हिक्मत चन्दले जानकारी गराए । प्रतियोगितमा पुरुष एकल, पुरुष डबल्र्स, महिला एकल र मिक्स डबल्र्सका खेलहरु समावेश गरिएको थियो ।

कञ्चनपुर महेन्द्रनगरकी सानिया पछिल्लो समय परिवारसँगै दुवईमा बस्दै आएकी छन् । सानियाले २०१९ मा दुवई जुनियर इन्टरनेसनल ब्याडमिन्टन सिरिजमा नेपाली युवा स्टार प्रिन्स दाहालसँग मिलेर मिक्स डबल्र्समा प्रतिस्पर्धा गर्दै कास्य पदक जितेकी थिइन् ।

विश्व ब्याडमिन्टन फेडेरेसन (बिडब्लुएफ) ले २०१९ मा एयर ब्याडमिन्टन प्रतियोगिता ल्याएको र युएईमा पहिलोपटक भएको हो । एयर ब्याडमिन्टन हल बाहिर खुल्ला ठाउँमा खेलिने खेल हो । यसका लागि विशेष आकृतिको रंगिन सेन्थेटिक सटल कक हुनेछ । नेपालमा यो खेल भित्रिसकेको छैन । यस प्रतियोगितामा नेपाली ब्याडमिन्टन अम्पायर ज्ञानु बरालले अम्पायरिङ गरेकी थिइन् ।