काठमाडौं (हाम्रो खेलकुद) – माइसको व्यवस्थापन र काठमाडौं जिल्ला ब्याडमिन्टन संघको प्राविधिक सहयोगमा साउन तेस्रो सातादेखि ब्याडमिन्टन क्याम्प सञ्चालन हुने भएको छ ।

देवीनगर ब्याडमिन्टन क्लब बानेश्वरको कोर्टमा क्याम्प १५ देखि २९ साउनसम्म सञ्चाल हुने काठमाडौं जिल्ला ब्याडमिन्टन संघका अध्यक्ष तथा ब्याडमिन्टनका अन्तर्राष्ट्रिय अम्पायर दीपक थापाले जानकारी गराए ।

‘पछिल्लो समय बच्चाहरुको अनलाइन क्लासहरु छैन । घरमै बसिरहेका कारण धेरै कुराहरु सोच्न सक्दछ,’ अम्पायर थापाले भने, ‘उनीहरुलाई शारीरिक र मानसिक रुपमा फिट राख्नकै लागि क्याम्पको आयोजना गरिएको हो । क्याम्पमा राम्रा देखिनेहरुलाई विभिन्न ठाउँमा प्रशिक्षणको अवसर मिलाउने लक्ष्य छ ।’

यस्तै थापाले क्याम्पमा खेलाउने मात्रै नभईकन ब्याडमिन्टनको बारेमा सैद्धान्तिक विषयमा पनि क्लास दिइने बताए । ‘क्याम्पमा हामी खेलाउने मात्र होइन । ब्याडमिन्टन के हो ? विश्वमा कस्तो हुन्छ । करियर के छ । इभेन्टहरु कसरी हुन्छ भन्ने बारेमा पनि सिकाउने छौं,’ अम्पायर थापाले भने ।

‘ब्याडमिन्टन इन्ड्रस्टीको बारेमा पनि जानकारी दिने छौं । सबै खेलाडी नै हुन्छन् भन्ने छैन । कसैको चासो अन्यतिर पनि हुन सक्छ । अन्य व्यवस्थापकीय काम गर्न इच्छा हुनेहरु पनि हुन्छन् । ल अफ ब्याडमिन्टनका कुरा पनि सिकाउने छौं ।’

क्याम्पमा ३२ जनालाई दिनको चार सिफ्टमा एक सिफ्टमा ८ जना रहने गरी दैनिक एक घन्टा प्रशिक्षण दिइनेछ । उमेर समूह नतोकिएका कारण इच्छा भएका जुनै उमेर समूहकाहरु क्याम्पमा प्रशिक्षणमा आउन सक्नेछन् ।

क्याम्पमा अम्पायर थापाले ब्याडमिन्टनको ल अफ थ्योरीबारे तथा बालकृष्ण थापा र पुरुषोत्तम ढकालले खेलको प्रशिक्षण दिनेछन् । डब्लुएचओको नियमको परिधिमा रहेर क्याम्प हुनेछ । क्याम्पको व्यवस्थापन माइस म्यानेजमेन्टले गरेको छ । अम्पायर थापाले क्याम्पका लागि ३ हजार रुपैया शुल्क राखिएको र शुल्क तिन नसक्ने, जेहेन्दार र प्रतिभावान खेलाडीलाई निशुल्क प्रशिक्षण दिइने बताए ।