एजेन्सी – स्पेनिस क्लब रियल म्याड्रिडले युइएफए च्याम्पियन्स लिगको प्रि–क्वाटरफाइनलको दोस्रो लेग इंग्लिस क्लब म्यानचेस्टर सिटीको मैदानमा नै खेल्नुपर्ने भएको छ ।

युरोपियन फुटबलको सर्वाेच्च निकाय युइएफएले बिहीबार प्रि–क्वाटरफाइनलका बाँकी रहेका दोस्रो लेगका खेलहरु सम्बन्धित क्लबले खेल्नुपर्ने ठाँउमै खेल्नुपर्ने निर्णय गरेपछि रियलले पनि सिटीको मैदान इतिहाद स्टेडियममा खेल्नुपर्ने भएको हो ।

पहिलो लेगमा रियल घरेलु मैदान सान्टियागो बर्नबेउमा सिटीसँग २–१ ले पराजित भएको थियो । दोस्रो लेगको खेल खेल्ने तयारी भइरहँदा कोरोना महामारीपछि खेलकुद गतिविधि ठप्प हुदा रियल र सिटीको खेल पनि अनिश्चित बनेको थियो ।

प्रि–क्वाटरफाइनलका खेलहरु अगस्ट ६ र ७ मा हुने छ । क्वाटरफाइनलदेखि सबै खेलहरु पोर्चुगलको लिस्वनमा १३ देखि २३ अगस्टसम्म मिनि टुर्नामेन्टको रुपमा हुनेछ । सबै खेलहरु क्लोज डोरमा हुनेछन् ।

रियललाई क्वाटरफाइनल प्रवेश गर्न कम्तीमा पनि २–० को जित आवश्यक छ । अन्यथा च्याम्पियन्स लिगको सर्वाधिक सफल रियल लगातार दोस्रो सिजन प्रि–क्वाटरफाइनलबाटै बाहिरिनेछ । सिटी भने यही नतिजा कायम गर्न सके अघिल्लो चरणमा प्रवेश गर्नेछ ।
यस्तै स्पेनिस क्लब बार्सिलोनाले इटालियन क्लब नेपोलीलाई घरेलु मैदानमा आतिथ्यता गर्नेछ । जर्मन क्लब बायर्न म्युनिखले चेल्सी तथा इटालियन क्लब युभेन्टसले फ्रेन्च क्लब लियोनलाई घरेलु मैदानमा आतिथ्यता गर्नेछ ।

बार्सिलोना र नेपोलीले पहिलो लेगमा १–१ गोलको बराबरी खेलेको थियो । बायर्नले चेल्सीलाई ३–० ले पराजित गर्दा युभेन्टस लियोनसँग १–० ले पछि छ । युरोपा लिगमा पनि यही अवधारणामा हुनेछ ।