एजेन्सी – इंग्लिस प्रिमियर लिगमा आज (शनिबार) राति ३३औं चरणको विभिन्न पाँच खेलमा प्रतिस्पर्धा हुँदैछ । शीर्ष चारको दौडमा रहेको लेस्टर सिटी, चेल्सी, म्यानचेस्टर युनाइटेड र वल्भ्सल आ–आफ्ना प्रतिद्धन्द्धीको सामना गर्दैछ । 

लिगको तेस्रो स्थानमा रहेको लेस्टर सिटीले १२औं स्थानमा रहेको क्रिस्टल प्यालेससँग राति ७ः४५ बजे प्रतिस्पर्धा गर्दैछ । यस्तै चौथो स्थानमा रहेको चेल्सीले १७औं स्थानमा रहेको वाट्फोर्डलाई घरेलु मैदानमा राति १२ः४५ बजे खेल्दैछ ।

म्यानचेस्टर युनाइटेडले बर्नमाउथको तथा वल्भ्स र आर्सनलबीच शनिबार राति नै प्रतिस्पर्धा हुदैछ । नर्विच सिटी र ब्राइटनले पनि आजै प्रतिस्पर्धा गर्दैछ ।  क्रिस्टल प्यालेसलाई पराजित गर्दै लेस्टर शीर्ष तीनलाई बलियो पकड बनाउन चहान्छ । क्रिस्टललाई पराजित गरे लेस्टरले चेल्सीको खेलअघि तेस्रो स्थानमा ४ अंकको फरक पार्नेछ ।

यता, अघिल्लो खेलमा वेस्टह्यामसँग स्तब्ध भएपछि शीर्ष तीनमा उक्लने मौका गुमाएको चेल्सी वाट्फोर्डलाई पराजित गर्दै शीर्ष तीनको यात्रालाई कायम राख्न चाहन्छ । शनिबार लेष्टर पराजित वा बराबरीमा रोकिएको खण्डमा र वाट्फोर्डलाई हराएमा चेल्सी तेस्रो स्थानमा उक्लनेछ ।

यस्तै युनाइटेडले घरेलु मैदानमा बर्नमाउथसँग साँझ ७ः४५ बजे प्रतिस्पर्धा गर्दैछ । बर्नमाउथलाई पराजित गर्दै युनाइटेड शीर्ष चारमा रहेको टोलीविरुद्ध अंक दुरी कम गर्न चाहन्छ । पाँचौं स्थानमा रहेको युनाइटेडको ५२ अंक रहेको छ ।  आर्सनलले उल्भ्ससँग उसैको मैदानमा खेल्दैछ । खेल राति १०ः१५ बजे हुनेछ । दुवै टिम जित निकाल्ने लक्ष्यमा हुनेछन् । आर्सनल ४६ अंक जोडेर आठौं स्थानमा रहेको छ । उल्भ्स ५२ अंक जोडेर छैटौं स्थानमा रहेको छ ।

आजको खेल

नर्विचविरुद्ध ब्राइटन (साँझ ५ः१५ बजे)

लेस्टरविरुद्ध क्रिस्टल प्यालेस (राति ७ः४५ बजे)

म्यानचेस्टर युनाइटेडविरुद्ध बर्नमाउथ (राति ७ः४५ बजे)

वल्भ्सविरुद्ध आर्सनल (राति १०ः१५ बजे)

चेल्सीविरुद्ध वाट्फोर्ड (राति १२ः४५ बजे)