एजेन्सी – इटालियन सिरी ‘ए’ मा आज (शनिबार) राति ३०औं चरणको तीन खेलहरुमा प्रतिस्पर्धा हुँदैछ । शीर्षस्थानमा रहेको युभेन्टससँगै दोस्रो स्थानमा रहेको लाजियोले पनि आज राति नै आ–आफ्ना प्रतिद्वन्द्वीसँग प्रतिस्पर्धा गर्दैछ ।

लिग लिडर युभेन्टसले घरेलु मैदानमा टोरिनोसँग नेपाली समयअनुसार राति ९ बजे प्रतिस्पर्धा गर्दैछ । युभेन्टस टोरिनोलाई पराजित गर्दै उपाधि यात्रालाई थप मजवुत बनाउने लक्ष्यसहित मैदानमा उत्रनेछ । पछिल्लो समय स्टार फरवार्ड क्रिस्टियानो रोनाल्डो र पाउलो डिबालाको तालमेल मिलिरहेको छ । उनीहरुलाई डगलस कोस्टा, मिरालेम प्यानिच, म्याथ्जि डि लेग्ट, डानिलो, जुवा कोर्डाडोजस्ता नाम चलेका खेलाडीले साथ दिनेछन् ।

त्यसैले युभेन्टस सहज प्रतिद्धन्द्धीमासथ सहज जित निकाल्दै उपाधि यात्रालाई थप बलियो बनाउने योजनामा हुनेछ । युभेन्टसले २९औं चरणको खेल सकिदा दोस्रो स्थानमा लाजियोलाई ४ अंकले पछि पारेको छ । युभेन्टसको ७२ तथा लाजियोको ६८ अंक छ ।

यता, टोरिनो पनि युभेन्टससँग अंक खोस्ने रणनीतिमा मैदान उत्रनेछ । टोरिनो पनि युभेन्ट्सलाई हराएर अंक तालिका सुधार गर्न चाहन्छ । युभेन्टस २०१५ को सिरी ‘ए’ मा टोरिनोसँग २–१ ले पराजित भएयता अपराजित रहन सफल भएको छ । त्यसयताका ११ खेलमा युभेन्टसले ९ खेलमा जित हात पार्दा दुई खेल बराबरी खेलेको छ ।

यस्तै अर्काे खेलमा दोस्रो स्थानको लाजियोले घरेलु मैदानमा एसी मिलानको आतिथ्यता गर्दैछ । खेल राति १ः३० बजे हुनेछ । मिलानलाई पराजित गर्दै लाजियो शीर्षस्थानको युभेन्टससँगको अंक दुरीलाई छोट्याउने दाउँमा हुनेछ । मिलान पनि लाजियोलाई स्तब्ध पार्दै अंक तालिकालाई सुधार गर्ने लक्ष्यमा हुनेछ । लाजियोको ६८ तथा सातौं स्थानको मिलानको ४३ अंक छ ।

सिरी ‘ए’ अन्तर्गत नै अर्को खेलमा ससुलो र लिसबीच राति ११ः१५ बजे प्रतिस्पर्धा हुदैछ ।