काठमाडौं (हाम्रो खेलकुद) – ब्याडमिन्टनका युवा स्टार प्रिन्स दाहाल र कीर्तिमानी राष्ट्रिय च्याम्पियन पुजा श्रेष्ठले प्रशिक्षण शुरुवात गरेका छन् । प्रिन्स र पुजाले शनिबारदेखि बुल्स इन्डोर ब्याडमिन्टन हलमा प्रशिक्षण थालेको हो । 

कोभिड–१९ को महामारीको त्रास र त्यसबाट बच्न नेपाल सरकारले गरेको ३ महिना भन्दा लामो लकडाउनलाई १ असारदेखि खुकुलो बनाएसँगै खेलाडीहरुले व्यक्तिगत प्रशिक्षण थालेको अन्तर्राष्ट्रिय ब्याडमिन्टन अम्पायर उदय अर्यालले जानकारी गराएका छन् ।

लकडाउका कारण राष्ट्रिय खेलाडीहरु तीन महिनाभन्दा बढी समय दैनिक अभ्यास गर्नबाट वञ्चित रहेका थिए । नेपाल सरकारले ५ चैतबाट खेलकुद गतिविधि स्थगित गर्दा ११ चैतबाट लकडाउन गरेको थियो ।

नेपाल ब्याडमिन्टन संघले हाल भएको खुकुलो लकडाउको समयमा ३ महिना अघि नेपाल ल्याएका कोरियन प्रशिक्षकबाट नेपालको वरीयता प्राप्त खेलाडीहरुलाई प्रशिक्षण गराउने योजना बनाइरहँदा विश्व ब्याडमिन्टनको जुनियर वरीयताको सातौ स्थानमा रहेका प्रिन्स दाहाल तथा महिला एकलतर्फका राष्ट्रिय कीर्तिमानी खेलाडी पुजा श्रेष्ठले बुल्स इन्डोर्स क्लबमा नियमित प्रशिक्षण थालिसकेका हुन् । पुजा महिलातर्फको पाँचपटकको राष्ट्रिय च्याम्पियन हुन् । उनी हाल विभागीय नेपाल एपिएफ क्लबमा आबद्ध छिन् ।

विश्व ब्याडमिन्टन फेडेरेसनको पछिल्लो वरीयता अनुसार सुदूरपश्चिमका प्रिन्स जुनियर वरीयतामा सातौ स्थानमा कायमै रहेका छन् । नेपाल ब्याडमिन्टन संघका अध्यक्ष रामजी बहादुर श्रेष्ठले खेलाडीहरुले प्रशिक्षण गर्दा सामाजिक दुरी कायम गरिने भएकाले प्रशिक्षणलाई गाह्रो नहुने तर, अभिभावकहरुसाग सल्लाह नगरी शुरु गर्न कठिन हुने बताएका छन् ।

बुल्स इन्डोर्सका प्रोपाइटर कृष्ण पुनले ब्याडमिन्टन खेलाडीको लागि प्रशिक्षणको लागि हलको अभाव भएमा आफ्नो हल प्रशिक्षणको लागि निशुल्क प्रयोगमा दिने बताएका छन् ।