एजेन्सी – स्पेनिस ला लिगामा आज रातिदेखि ३०औं चरणको खेलहरु हुँदैछ । ३०औं चरणको पहिलो दिन ३ खेल हुदैछ । शीर्षस्थानमा रहेको बार्सिलोनाले सेभियाको भ्रमण गर्दा ग्रानडा र भिल्लारियल तथा रियल मालोर्का र लेगानेसबीच पनि प्रतिस्पर्धा हुनेछ ।

सेभिया र बार्सिलोनाबीचको खेल सेभियाको मैदानमा नेपाली समयअनुसार राति १ः४५ बजेपछि हुनेछ । सेभियाविरुद्धको खेल बार्सिलोनाको लागि निकै महत्वपुर्ण रहेको छ । सेभियाविरुद्ध जित हात पार्न सके बार्सिलोनाले शीर्षस्थानमा पुनः ५ अंकको अग्रता बनाउने छ । बराबरीले ३ अंकको तथा हारले २ अंकको अग्रता नै कायम राख्नेछ ।

यस्तोमा बार्सिलोना सेभियाविरुद्ध जित निकाल्दै उपाधि दावेदारितालाई थप बलियो बनाउन चाहन्छ । कोरोनापछिको सुरुवाती दुवै खेलमा जित निकालेको बार्सिलोना सेभियाविरुद्ध पनि जितलाई निरन्तरता दिने लक्ष्यसहित मैदान उत्रनेछ ।

कप्तान लियोनेल मेस्सीको लय लुइस सुआरेज, एन्टोइन ग्रिजमले बार्सिलोनाको अग्रपङ्ति सम्हाल्नेछन् । वैकल्पिक खेलाडीको रुपमा मार्टिन ब्रेथवेटसँगै युवा स्टार अन्सु फातीले बार्सिलोनालाई अघि बढाउन सक्नेछ । कप्तान मेस्सी करिअरमा ७ सयौं गोल पूरा गर्ने संघारमा छन् ।

यसबाहेक बार्सिलोनासँग आर्टुरो भिडाल, फ्रान्की डि जोङ, सर्जियो बुस्क्वेट्स, जोर्डी अल्वा, जेरार्ड पिके, क्लेमेन्ट लेङ्लेट, नेल्सन सेमेडो र गोलरक्षक मार्क आन्द्रे टेर स्टेगनजस्ता स्तरीय खेलाडीहरु रहेका छन् ।

बार्सिलोना सेभियासँग पछिल्लो तीन खेलमा अपराजित रहेको छ । २४ जनवरी २०१९ को कोपा डेल रे क्वाटरफाइनलको पहिलो लेगमा बार्सिलोना सेभियासँग २–० ले पराजित भएको थियो ।

यता, घरेलु मैदानमा सेभिया बार्सिलोनालाई स्तब्ध पार्दै अकं तालिकामा सुधार गर्दै अर्काे सिजनको च्याम्पियन्स लिगको यात्रालाई मजबुत बनाउन चाहन्छ । पछिल्लो ८ खेलमा अपराजित रहेको सेभिया बार्सिलोनालाई पनि पराजित गर्दै अपराजित यात्रा कायमै राख्न चहान्छ ।

सेभियाका लागि लुकास ओकाम्पस, लुक डि जोङ र मुनिर इल हाडाडी मुख्य हतियार हुनेछन् । इभर बनेगा, जेसस नाभास र सर्जियो रिगुइलन सेभियाको साथमा छ ।

पछिल्लो २९ खेलको नतिजा हेर्दा बार्सिलोना नै हावी छ । बार्सिलोनाले २२ खेलमा जित हात पार्दा सेभियाले ३ खेलमा जित निकालेको छ । ४ खेल बराबरीमा सकिएको छ ।

शीर्षस्थानमा रहेको बार्सिलोनाको २९ खेलबाट ६६ अंक रहेको छ । बिहीबार राति मात्रै भ्यालेन्सियामाथि ३–० को जित हात पार्दै रियल म्याड्रिडले अंक दुरी २ मा छोट्याएको छ । रियको ६४ अंक छ । तेस्रो स्थानमा रहेको सेभियाको २९ खेलबाट ५१ अंक छ ।

अन्य खेल

ग्रानडाविरुद्ध भिल्लारियल (राति २३ः१५ बजे)

रियल मालोर्काविरुद्ध लेगानेस (राति २३ः१५ बजे)