एजेन्सी – स्पेनिस ला लिगाअन्तर्गत आइतबार भएको खेलमा एथ्लेटिको बिल्बाओ र एट्लेटिको मड्रिडले १–१ गोलको बराबरी खेल्दै अंक बाँडेका छन् । घरेलु मैदानमा विल्वाओका इकर मुनिआइनले गोल गर्दा एट्लेटिकोका डिएगो कोस्टाले बराबरी गोल फर्काएका थिए ।

सान मामिस बारियामा आइतबार साँझ भएको प्रतिस्पर्धात्मक खेलमा दुवै गोल पहिलो हाफमा सम्भव भएको थियो । एट्लेटिकोविरुद्ध राम्रो सुरुवात गरेपनि एट्लेटिको खेलको १२औं मिनेटमा पहिलो आक्रमण बुनेको थियो । यानिक कारास्कोले मार्काेस लोरेन्टेको पासमा गोल गर्न चुकेका थिए । २५औं मिनेटमा एन्डर कापाको प्रहारलाई एट्लेटिकोका गोलरक्षक यान ओब्लाकले विफल पारे ।

त्यसपछि लगातार एट्लेटिकोलाई दवावमा राखेको विल्वाओका इकर मुनिआइनले ३७औं मिनेटमा गोल गर्दै घरेलु टोलीलाई अग्रता दिलाए । युरी बेरचिचेको लो क्रसमा इकरको प्रहार एट्लेटिको डिफेन्डरलाई डिफ्लेक्ट हुदै गोलमा परिणत हुँदा ओब्लाकले रोक्ने कुनै मौका नै पाएनन् । तर, बिलबाओको अग्रता दुई मिनेट पनि टिकेन ३९औं मिनेटमा डिएगो कोस्टाले कोकेको चलाखीपुर्ण पासमा गोल गर्दै खेललाई १–१ गोलको बराबरीमा ल्याए ।

दोस्रो हाफमा पनि दुवै टोलीले गोलको केही अवसर सिर्जना गरेपनि सदुपयोग गर्न नसक्दा खेल १–१ गोलको बराबरीमा टुंगियो । बराबरीसँगै एट्लेटिकोले चौथो स्थानमा उक्लने मौका गुमाएको छ । चौथो स्थानको रियल सोसिडाडसँग समान ४६ अंक रहेपनि एट्लेटिको छैटौं स्थानमा यथावत छ । बिल्बाओ ३८ अंक जोडेर १०औं स्थानमा यथावत छ ।