काठमाडौं (हाम्रो खेलकुद) – नेपाली पारा तेक्वान्दो टोलीका पूर्वप्रशिक्षक कल्याण कुँवरले राष्ट्रिय टोलीका आफ्ना खेलाडीलाई आर्थिक सहयोग प्रदान गरेका छन् ।

सातदोबाटोस्थित नेपाल तेक्वान्दो संघको एकेडेमीमा शनिबार पारा तेक्वान्दो टोलीका प्रशिक्षक कविराज नेगी लामाले सात जना खेलाडीलाई आर्थिक सहयोग प्रदान गरेका हुन् । कोरोना भाइरसको संक्रमणसँगै लकडाउनका कारण समस्या परेका खेलाडीलाई पूर्वप्रशिक्षक कुँवरले सहयोग गरेका हुन् ।

नेपाली पारा तेक्वान्दोमा धेरै सफलता दिएका कुँवरले खेलाडीलाई जनही तीन हजार रुपैयाँ सहयोग गरेका थिए । अर्का प्रशिक्षक लामाले पनि सोही अवसरमा खेलाडीलाई १-१ हजार थपिदिएका थिए । साथै लामो समयको लकडाउनका कारण खेलाडीलाई समस्या परेका थिए ।

यसअघि नेपाल तेक्वान्दो पारा तेक्वान्दो कमिटीले पनि खेलाडीहरूलाई खाद्यान्न र आर्थिक सहयोग प्रदान गरेको थियो । प्रशिक्षकद्वय कुँवर र लामाले पनि खेलाडीलाई थप सहयोग गर्ने उद्देश्यले आँफै अग्रसरता देखाएका हुन् । सो अवसरमा खेलाडीद्वय रन्जना धामी र राम अधिकारीले आफ्नै प्रशिक्षकहरूबाट मिलेको सहयोगले आफूहरूको जीवनमा विशेष अर्थ राख्ने बताए ।

‘उहाँहरूले हामीलाई शिक्षा दिनुभयो र गुरु दक्षिण हामीले दिनुपर्ने हो । तर हाम्रो समस्यालाई बुझेर साथ दिनु भएको छ र यो हाम्रो लागि लाखौं बराबरको सहयोग हुनेछ,’खेलाडीहरूले भने ।