काठमाडौं (हाम्रो खेलकुद) – शारीरिक सुगठन तथा फिटनेस संघले जिम तथा फिटनेस सेन्टर (व्यायामशाला) खुल्ला गर्नको लागि काठमाडौं जिल्ला प्रशासन कार्यलयमा ज्ञापन पत्र बुझाएका छन् ।

संघका अध्यक्ष सुरेश सुवेदीको नेतृत्वमा संघले सोमबार सुरक्षित तरिकाले फिटनेस सेन्टरहरु खुलाउन माग गर्दै जिल्ला प्रशासन कार्यलयमा ज्ञापनपत्र बुझाएको हो ।

ज्ञापनपत्रमा संसारभरका विज्ञहरुले यो महामारी छिटै नसकिने भएकोले डब्लुएचओको निर्देशनअनुसार सम्पूर्ण मापदण्डहरु पूरा गरेर सावधानीपूर्वक जनजीवन सहजीकरणतर्फ लैजानुपर्छ भनि सुझाएका र फिटनेस सेन्टर पनि सावधानी अपनाएर खुला गराइदिन उल्लेख गरेका छन् । यस्तै ज्ञापनपत्रमा कोरोना परास्त गर्न उचित खानपानका साथै दैनिक व्यायामको आवश्यकता रहेको र जसका लागि बन्द रहेको जिम तथा फिटनेस सेन्टर यथाशिघ्र छिटो खोल्नु जरुरी देखिने उल्लेख गरिएको छ ।

नेपालमा पनि कोभिड १९ कारण थगत चैत महिनादेखि लकडाउन शुरु भई हालसम्म कायम रहेको छ । काठमाडौंमा मात्रै अरबौ लगागी २०० भन्दा बढी फिटनेस सेन्टर रहेका छन् । हाल बन्दका कारणले जिम संचालकहरुले कर्मचारीहरुलाई तलब, घरभाडा, बैंक ब्याज, बिजुलीको महशुल र नेपाल सरकारलाई बुझाउनुपर्ने कर बुझाउन नसक्ने स्थितिमा पुगेको ज्ञापनपत्रमा उल्लेख छ ।

ज्ञापनपत्रमा जिम सञ्चालन गर्दा पालना गर्नुपर्ने नियमहरु पनि समावेश गरेका छन् । नियममा तापक्रम नाप्ने, साबुन पानीले हात धुने, स्यानिटाइजर प्रयोग गर्ने, सामाजिक दुरी कायम राख्ने, एक घन्टाको प्रयोगपछि जिम मेसिन स्यानिटाइज गर्ने र एक पटकमा १० जनालाई मात्रै प्रवेश गर्न दिइने उल्लेख गरेका छन् ।