काठमाडौं (हाम्रो खेलकुद) – कोभिड १९ ले विश्व नै अक्रान्त भईरहेको बेला खेलकुद क्षेत्रलाई सक्रिय राख्ने उद्धेश्यले विश्व खेलकुद संस्थाहरुले विभिन्न कार्यक्रमलाई अनलाइनमार्फत अघि सार्दै आइरहेका छन् ।

यसै क्रममा विश्व पारा पावर लिफ्टिङ अर्गनाइजेशनले पनि आफ्ना सदस्य राष्ट्रबीच खेलाडीहरुलाई क्रियाशिल राख्ने र खेल क्षमतालाई कमि हुन नदिने उद्धेश्यले अनलाईन प्रतिस्पर्धा गराएको छ । अर्गनाइजेशनले दोश्रो अनलाईनल विश्वकप सिरिज आयोजना गर्दै सदस्य राष्ट्रका खेलाडीहरुलाई क्रियशिल पार्ने उद्धेश्यका साथ प्रतिस्पर्धा गराएको हो ।

सिरिजमा विश्व पारा पावर लिफ्टिङ अर्गनाइजेशनमा दर्ता रहेका तीन नेपाली खेलाडीले सहभागिता जनाएको प्रशिक्षक संजय महर्जनले जानकारी गराएका छन् । नेपाली खेलाडीहरुमा निर्मला भण्डारी (५५ केजीमुनि), दुर्गामान तामाङले (८० केजी) र शरद पौड्यालले ९० केजीमा प्रतिस्पर्धा गरेका थिए ।

निर्मलाले पहिलो लिफ्टमा ४५ केजी, दोश्रोमा ५० र तेश्रोमा ५५ केजी भार बहन गरेकी थिईन् । यस्तै शरदले पहिलोमा ८५ केजी, दोश्रोमा ९० केजी र तेश्रोमा ९५ केजी तथा तामाङले पहिलोमा ९० केजी, दोश्रोमा ९५ केजी र तेश्रोमा १०५ केजी तौल भार बहन गरेका थिए ।
कम्मरमुनिको भागमा अपाङ्गता रहेका व्यक्तिहरुले प्रतिस्पर्धा गर्ने उक्त विश्वकप सिरिजमा नेपालसहित २० राष्ट्रका ४३ खेलाडीहरुले प्रतिस्पर्धा गरेका थिए ।

११ देखि २४ मे सम्म भएको प्रतिस्पर्धाको २५ देखि ३१ मे सम्म टेक्निकल अफिसियल जजमेण्ट र जुन २ तारिखका दिन नतिजा प्रकाशन गरिने विश्व पारा पावर लिफ्टिङ अर्गनाइजेशनले जनाएको छ । सिरिजमा प्रतिस्पर्धा गर्ने खेलाडीहरुले अनलाईन वरीयता प्राप्त गर्नुका साथै प्रमाण पत्र प्राप्त गर्नेछन् ।