काठमाडौं (हाम्रो खेलकुद) – नेपाल वादोरियो कराते डो संघ ब्ल्याक बेल्ट कमिटीको आयोजनामा लकडाउनको समयमा घर भित्र रहेर गरिने शारीरिक ब्यायामहरुको भिडियो प्रतिस्पर्धामा बिकबहादुर थामी पहिलो भएका छन् । 

थामीले ६५ प्रतिस्पर्धाीलाई पछि पार्दै पहिलो स्थान हात पार्न सफल भएको हो । हिक्मत रोक्का मगरको भिडियोले दोस्रो तथा शान्ति तामाङको भिडियोले तेस्रो स्थान हासिल गरेको छ । पहिलो भएका थामाीले ५ हजार, दोस्रो भएको हिक्मत मगरले २ हजार ५ सय तथा तेस्रो भएको शान्ति तामाङले १ हजार ५ सय हात पारिन् ।

गत २० बैशाखबाट ५ जेठसम्म भएको प्रतिस्पर्धामा ६५ जनाले भिडियो पठाएर प्रतिस्पर्धा गरेका थिए । कम्तीमा १ मिनेट समय भन्दा माथिको भिडियो कराते नेपाल समूहमा पोष्ट गरेर सहभागिता जनाएका थिए । प्रतियोगिता नेपाल कराते महासंघ महासचिव, नेपाल वादोरियो कराते डो संघका अध्यक्ष एवम् प्रमुख प्रशिक्षक हरिशरण केसीको विशेष निर्देशनमा आयोजना गरिएको थियो । उनले भिडियो प्रतिस्पर्धा जित हारको लागि भन्दा पनि हामी हाम्रो स्वास्थ्य प्रति कतिको सचेत छौ हामीले जानेका शारीरिक ब्यायामको अभ्यास परिवारका सदस्यहरु माझ कसरी सिकाउन सक्छौं भन्ने उदेश्यले गरिएको बताए ।

नेपाल वादोरियो कराते डो संघका केन्द्रिय सदस्य एवम् अन्तर्राष्ट्रिय खेलाडी सिमोन खत्री र ब्ल्याक बेल्ट कमिटीका सचिब पुरुषोत्तम पोखरेलले संयोजन गरेका थिए । यस्ता प्रतिस्पर्धाले लक डाउनको बेला ट्रेनिङ स्थल सम्म आएर ट्रेनिङ गर्न नपाएका खेलाडीहरुको मनोबल उच्च पार्ने हुँदा आगामी दिनमा पनि यस्ता प्रतिस्पर्धाहरु गर्दै जाने कुरा संयोजक पोखरेलले बताए ।