एजेन्सी – कोरोना महामारीपछि शनिबारदेखि पुन सुरु भएको जर्मन बुन्डेसलिगाको दोस्रो दिन आज (आइतबार) दुई खेल हुँदैछ ।  शीर्षस्थानमा रहेको बायर्न म्युनिखले युनियन बर्लिनसँग तथा एफसी कोल्न र माइन्जबीच दोस्रो दिन प्रतिस्पर्धा हुँदैछ ।

बायर्न र बर्लिनबीचको खेल नेपाली समयअनुसार राति ९ः४५ बजेपछि तथा कोलोन र मेन्जबीचको खेल साँझ ७ः१५ बजे हुनेछ ।  उपाधि होडमा रहेको बायर्न युनियन बर्लिनलाई पराजित गर्दै पुन शीर्षस्थानमा ४ अंकको अग्रता कायम गर्ने दाउमा हुनेछ । बायर्नका लागि फरवार्ड रोवर्ट लेवान्डोस्की, थोमस मुलर, फिलिपे कौटिन्हो मुख्य हतियार हुनेछन् ।

शीर्षस्थानको बार्यनको २५ खेलबाट ५५ अंंक छ । शनिबार राति बोरुसिया डर्टमण्ड र बोरुसिया मोन्चेनग्लाडवाचले जित निकाल्दै शीर्षस्थानको बायर्नमाथि दबाब बढाएका छन् । आजको जितले बायर्नले पुनः ४ अंकको अग्रता बनाउनेछ । बराबरीले बायर्न २ अंकको तथा हारले पनि बायर्नले १ अंकको अग्रता लिँदै शीर्षस्थानमा नै रहनेछ ।

यता, घरेलु टोली बर्लिन बायर्नलाई स्तब्ध पार्दै अंक तालिकामा सुधार गर्ने लक्ष्यमा हुनेछ । बर्लिन ३० अंक जोडेर १२औं स्थानमा रहेको छ ।

अर्को खेलमा रेलिगेशन जोनबाट बच्न संघर्षरत माइन्जले कोल्नसँग प्रतिस्पर्धा गर्नेछ । रेलिगेशन जोनभन्दा मात्र एक स्थानमाथि रहेको माइन्जलाई जित निकाल्दै अंक तालिकामा सुधार गर्ने अवसर प्राप्त छ । माइन्ज २६ अंकसहित तालिकाको १५औं स्थानमा छ । कोल्न ३२ अंक जोडेर १०औं स्थानमा छ ।