काठमाडौं (हाम्रो खेलकुद) – धनगढी कराँते डोजोका जगत सिंह धानुक र खोटाङ डोजोका रोस्मा राईले प्रथम राष्ट्रिय अनलाइन कराँते काता प्रतियोगितामा स्वर्ण पदक जितेका छन् । जगत पुरुषतर्फ तथा रोश्मा महिलातर्फ च्याम्पियन बन्न सफल भएको हो ।

शंखडोल डोजो गोकर्णेश्वरको आयोजनामा भएको प्रतियोगितामा जगत सिंह धानुकले २४.२ अंक जोडे । बालाजु डो एकेडेमीका धिरेश श्रेष्ठले २३ अंक जोड्दै दोस्रो स्थान हात पार्दा नरहरि डोजोका स्वर्णिम मानन्धरले २२.५ अंक जोड्दै कास्य जित्न सफल भए ।

महिलातर्फ रोश्मा राईले २४.५ अंक जोड्दै स्वर्ण जितिन् । धनगढी कराँते एकेडेमीकी वर्षा राउतले २३ अंक जोड्दै दोस्रो तथा एपिएफकी सरिता श्रेष्ठले २२.५ अंक जोडेर कास्य पदक जित्न सफल भइन् । महिला र पुरुष दुवैतर्फ शीर्ष तीनमा रहेका खेलाडीहरुले क्रमशः १२ हजार ५ सय, ५ हजार ५ सय र ४ हजार रुपैया हात पारे । लैनचौर डोजोका रेहन जावेद राइजिङ स्टार तथा प्रदीप राई म्याचोर खेलाडी घोषित भए ।

१३औं सागको दोहोरो स्वर्णधारी मन्डेकाजी श्रेष्ठ, आठां साफका स्वर्ण विजेता तथा १३औं सागका करातेका प्रशिक्षक गंगाराम महर्जन, राष्ट्रिय खेलाडी विजय लामा र शंखडोल डोजोका प्रमुख प्रशिक्षक भीमराम कारन्जितले प्रतियोगिताको निर्णायकको भुमिका निर्वाह गर्दै विजेता छानेका थिए ।

प्रतियोगिताको आठौं सागका स्वर्ण विजेता तथा नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठको विशेष सहयोग रहेको थियो । प्रतियोगितामा पुरुषतर्फ २२ र महिलातर्फ ११ जनाले सहभागिता जनाएका थिए । उनीहरुले आफ्नो खेलको भिडियो अनलाइनमार्फत पठाएर प्रतियोगितामा सहभागिता जनाएका थिए ।

कोरोना महामारीको कारण पछिल्लो समय प्रतियोगिताहरु हुन नसक्दा खेलाडीहरु घरमै बसेर अभ्यासमा व्यस्त छन् । खेलाडीहरुले अनलाइनमा भिडियो पठाएर अनलाइन प्रतियोगितामा सहभागिता जनाउने गरेका छन् ।