काठमाडौं (हाम्रो खेलकुद) – राष्ट्रिय टोलीका सदस्य विपना ब्लोन पशुपति रोड क्यारियर (पिआरसी) ओपन स्क्वास प्रतियोगिताको महिला एकलमा उपाधिनजिक पुगेकी छन् ।

सातदोबाटोस्थित नेपाल स्क्वास राकेट्स संघको कोर्टमा आइतबार भएको लिग राउन्डको चौथो खेलमा भावना सुनुवारलाई पराजित गर्दै विपना उपाधिनजिक पुगेकी हुन् । अब विपनाले लिग राउन्डको अन्तिम खेलमा अस्मिता नगरकोटीलाई पराजित गर्न सके उपाधि आफ्नो पक्षमा पार्नेछ ।

उत्कृष्ट प्रदर्शन गरिरहेकी विपनाले शनिबार राष्ट्रिय च्याम्पियन कृष्णा थापाालाई पराजित गरेकी थिइन् । यस्तै पुरुष एकल खुल्लामा नेपाल नम्वर एक अरहान्त केशर सिंह, क्रिस ओ ब्रिन, निक म्यक ब्रेथ र नेपा लनम्वर दुई अमृत थापा मगरले सेमिफाइनलको यात्रा तय गरेका छन् । अरहान्तले बेलयाती आर्मीका पाउल हर्टलीलाई ३–० को सोझो सेटमा हराए ।

बेलायती आर्मीका क्रिस ओ ब्रिनले नेपालका प्रविन विरसिंह कंसकारलाई ३–१ को सेटमा हराए । बेलायतका निकले नेपालका दीपक थापालाई ३–० को सेटमा तथा नेपाल नम्वर २ अमृतले बेलायती सेनाका पंकज राजलाई ३–० को सोझो सेटमा हराए । सेमिफाइनलमा अरहान्त र क्रिस ओ ब्रिन तथा अमृत र निकबीच प्रतिस्पर्धा हुनेछ ।

मास्टर्स ओपनमा राजेन्द्र शाक्यले पाउल हर्टलीलाई ३–१ को सेटमा तथा फ्रान्सक स्टिभले मार्क होवेललाई ३–० को सेटमा हराउदै सेमिफाइनलमा स्थान बनाए । नेपालका प्रज्वल प्रधानले नेपालकै लालबहादुर गुरुङलाई ३–१ को सेटमा तथा सुदिप बहादुर सिंहले महेन्द्र महर्जनलाई ३–० को सेटमा हराएर अन्तिम चारको यात्रा तय गरे ।

सोमबार सेमिफाइनलमा राजेन्द्र र स्टिभ तथा प्रज्वल र सुदीपबीच प्रतिस्पर्धा हुनेछ । फाइनल मंगलबार हुनेछ । प्रतियोगितामा पुरुष खुल्ला, महिला खुल्ला, मास्टर ४५ वर्ष तथा सो भन्दा माथि गरी तीन विधामा प्रतिस्पर्धा हुनेछ ।