भावना र विपनाको विजयी शुरुवात

काठमाडौं (हाम्रो खेलकुद) – भावना सुनुवार र विपना ब्लोनले पशुपति रोड क्यारियर (पिआरसी) ओपन स्क्वास प्रतियोगितामा विजयी शुरुवात गरेका छन् ।

सातदोबाटोस्थित नेपाल स्क्वास राकेट्स संघको कोर्टमा शुक्रबार भएको खेलमा भावनाले अस्मिता नगरकोटीलाई सोझो सेटमा तथा विपनाले स्वस्थानी श्रेष्ठमाथि ३–१ को सेटमा जित निकालेको हो ।

एकपक्षीय खेलमा भावनाले अस्मितामाथि ११–२, ११–० र ११–३ को सहज जित निकालेकी हुन् । अर्काे खेलमा विपनाले स्वस्थानीमाथि ८–११, ११–२, ११–६ र ११–३ को जित हात पारेकी हुन् । यस्तै राष्ट्रिय च्याम्पियन कृष्णा थापाले सपना ब्लोनलाई ३–० को सोझो सेटमा पराजित गर्दै विजयी शुरुवात गरेकी छिन् ।

२७ फागुनसम्म सञ्चालन हुने प्रतियोगितामा पुरुष खुल्ला, महिला खुल्ला, मास्टर ४५ वर्ष तथा सो भन्दा माथि गरी तीन विधामा प्रतिस्पर्धा हुनेछ । प्रतियोगिताको लागि ६० भन्दा बढी खेलाडीको सहभागिता रहने र बेलायतको ब्रिटिस आर्मीका १० जनाको पनि सहभागिता रहने संघले जनाएको छ ।