काठमाडौं (हाम्रो खेलकुद) – नेपाल  र्‍याफ्ट एण्ड कायक क्लब फिस्लिङ ‘ए’ चौथो राष्ट्रिय  र्‍याफ्टिङ प्रतियोगिताको टिम च्याम्पियन बन्न सफल भएको छ । सिन्धुपाल्चोकको सुकुटेस्थित भोटेकोसीमा भएको प्रतियोगितामा कुल १ हजार पूर्णाङकमा ९५१ अंकका साथ नेपाल र्‍याफ्ट एण्ड कायक क्लब फिस्लिङ ‘ए’ च्याम्पियन बन्न सफल भएको हो ।

आठौं पर्वतिय खेलकुद महोत्सव अन्तरगत नेपाल  र्‍याफ्टिङ एण्ड क्यानोईङ संघको आयोजना तथा सिन्धु पर्यटन ब्यवसायी संघको सहयोगमा तीन दिन सम्म सञ्चालित प्रतियोगितामा क्याप्टेन सुरज गुरुङ, खेलाडीहरु सविन गुरुङ, दिपेश गुरुङ, शक्ति गुरुङ र रवि मिया सम्मिलित नेपाल र्‍याफ्ट एण्ड कायक क्लब फिस्लिङ ‘ए’ टिमले स्प्रिन्टमा प्रथम भई १०० अंक, हेड टु हेड विधामा प्रथम भई २०० अंक, स्लालम विधामा प्रथम भई ३५० अंक तथा डाउन रिभर रेश विधामा तेश्रो भई ३०१ अंक ल्याई कुल ९५१ अंकका साथ प्रथम स्थान हात पारेको हो ।

प्रतियोगीतामा काठमाडौंको नेपाल कायक क्लब स्प्रिन्ट र हेड टु हेड विधामा दोश्रो, स्लालम विधामा चौथो तथा डाउन रिभर रेश विधामा पहिलो भई क्रमशः ९२, १८४, २८७ तथा ३५० अंंक गरि कुल ९१३ अंंकका साथ दोश्रो भयो ।

कुल ८७६ अंक प्राप्त गरेको कास्कीको प्याडल नेपाल टिम तेश्रो भयो । टिममा ५ खेलाडी रहने  र्‍याफ्टिङ खेलमा प्रथम हुने नेपाल र्‍याफ्ट एण्ड कायक क्लब फिस्लिङ ‘ए’ ले ४० हजार रुपैया हात पार्‍यो । दोश्रो भएको कायकले २५ हजार तथा तेस्रो भएको प्याडल नेपालले १५ हजार रुपैया हात पारे ।

यस्तै आठौं राष्टिय कायक स्लालम प्रतियोगितामा चितवनका मोहन राना ११४.१० अंकका साथ प्रथम भए । रानाले १५ हजा पाए । ११९.६७ अंक जोड्दै दोश्रो भएका उदयपुरका डम्बर बहादुर पुर्वाछानेले १० हजार पाए । तेश्रो स्थानमा धादिडका रन्जन कडेल रहे । उनले १२१.५२ अंक प्राप्त गरे । कँडेलले ५ हजार पाए । आठौं राष्टिय कायक स्लालम प्रतियोगितामा ३० खेलाडीले प्रतिस्पर्धा गरेका थिए ।