काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिग अन्तरगत आज (सोमबार) दशौं राउन्डको तेस्रो दिन दुई खेल हुनेछ ।

सातदोबाटोस्थित एन्फा कम्प्लेक्सको खेल मैदानमा हुने दिनको पहिलो खेलमा यति प्रभु जावलाखेल युथ क्लब र ब्रिगेड ब्वाइज क्लब (बीबीसी) बीच बिहान ११ः३० बजे तथा अर्काे खेलमा लिगमा अपराजित रहेको मनाङ–मर्स्याङ्दी क्लब र च्यासल युथ क्लबबीच दिउँसो ३ बजे प्रतिस्पर्धा हुँदैछ ।
लिगमा अपराजित रहेको एक्लो टोली मनाङ च्यासललाई पराजित गर्दै अपराजित रहँदै उपाधि यात्रा जीवितै राख्न चहान्छ । अपराजित मनाङ ९ खेलबाट १९ अंक जोडेर तेस्रो स्थानमा रहेको छ । च्यासल ९ खेलबाटै ९ अंक जोडेर १०औं स्थानमा छ ।

पुराना स्टार खेलाडीले क्लब छाडेपनि युवा टोलीले मनाङलाई लिगको नवौं चरणसम्म अपराजित राख्न सफल भएको छ । जसमा ५ जित र ४ बराबरीको नतिजा छ । मनाङ च्यासललाई पराजित गर्ने लक्ष्यमा मैदानमा उत्रनेछ । बराबरी या हारले मनाङको उपाधि सम्भावना झिनो बन्नेछ । त्यसैले मनाङ च्यासलविरुद्ध ३ अंककै लागि खेल्नेछ ।

मनाङसँग अन्जन विष्ट, रन्जन विष्ट, कमल श्रेष्ठ, बिमल राना, फेमी जोसवा, दयानन्द सिंह, लुइस भिडाल, दीप कार्की, पुजन उपरकोटी र निशान लिम्बुको साथ छ । यता, च्यासल पनि मनाङलाई स्तब्ध पार्दै अंक तालिकामा सुधार गर्ने लक्ष्यमा हुनेछ । सुरुवाती दुई खेलमा दमदार शुरुवात गरेपनि त्यसपछि लय गुमाएको च्यासल मनाङलाई हराउदै लय पक्रने दाउमा हुनेछ ।

राष्ट्रिय टोलीका पुर्व फरवार्ड सन्तोष साहुखल चल्न सके च्यासलले नतिजा आफ्नो पक्षमा पार्न सक्नेछ । च्यासलसँग सन्तोषसँगै एलन न्यौपाने, हेमन्त थापामगर, सुनिल बल, नितिन थापा, अमिर श्रेष्ठ र सुनिल खड्कासँगै दुई जापानी खेलाडी टाइगा नाकामुरा र हायतो वाकिनोको साथ छ ।

दिनको पहिलो खेलमा जावलाखेल र बीबीसीबीच प्रतिस्पर्धा हुदैछ । रेलिगेसनबाट बिबिसी पूर्ण रुपमा सुरक्षित नभएको अवस्थामा खेल रोमाञ्चक हुने अपेक्षा गरिएको छ । जावालखेल बीबीसीलाई पराजित गर्दै शीर्ष ६ को सम्भावनालाई जीवित राख्ने दाउमा रहँदा बीबीसी जावलाखेललाई हराउदै अंक तालिकामा सुधार गर्ने लक्ष्यमा हुनेछ । जावलाखेल १२ अंकसहित आठौं तथा ८ अंक जोडेको ११औं स्थानमा छ ।