काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिग फुटबल अन्तरगत नवौं राउन्डको दोस्रो दिन आज दुई खेल हुँदैछ ।

नवौं राउन्डको दोस्रो दिन पहिलो खेलमा यति हिमालयन शेर्पा क्लब र सरस्वती युवा क्लबबीच बिहान ११ः३० बजे तथा प्रभु जावलाखेल युथ क्लब र विभागीय त्रिभुवन आर्मी क्लबबीच दिउँसो ३ बजे प्रतिस्पर्धा हुदैछ । दुवै खेल सातदोबाटोस्थित एन्फा कम्प्लेक्सको खेल मैदानमा हुनेछ ।

लिगको आठौं राउन्डमा एनआरटीसँग गोलरहित बराबरीसँगै स्पष्ट ३ अंकको अग्रता लिनबाट चुकेको आर्मीलाई जावलाखेलविरुद्ध जित निकाल्दै पुन शीर्ष स्थानमा फर्कने अवसर छ । लिगको नवौँ चरणको खेल चलिरहदाँ शीर्षस्थानको मछिन्द्रभन्दा एक खेल कम खेलेको आर्मी दुई अंकले पछि छ ।

नाम चलेका खेलाडीको बाहुल्यता रहेको आर्मी जावलाखेललाई पराजित गर्ने लक्ष्यमा हुनेछ । शीर्ष स्थानमा फर्कन उसलाई जावलाखेलविरुद्ध जित्नैपर्ने दवाव छ । भरत खवास, नवयुग श्रेष्ठ, सन्तोष तामाङ र जर्जप्रिन्स कार्की जस्ता खेलाडीले फरवार्ड लाईन सम्हालेपनि सोचे अनुरुपको प्रदर्शन हुन सकेको छैन । दिनेश हेन्जन, सुमन अर्याल, सेसेहाङ आङदेम्वे, बिकेश कुथु र बिकास खवास जस्ता नाम चलेका खेलाडीको आर्मीलाई साथ छ ।

यता, शीर्ष ६ भित्रको लक्ष्य बनाएको जावलाखेलले आर्मीविरुद्ध दबाब विनै मैद्यानमा उत्रने योजना छ । राम्रो शुरुवात गरेको जावलाखेलले मछिन्द्रसँगको हारसँगै लय गुमाउन पुगेको थियो । जावलाखेल आर्मीविरुद्ध आफ्नो रिदम फर्काउने सुरमा हुनेछ ।

दिनकै पहिलो खेलमा शेर्पा र सरस्वतीबीच प्रतिस्पर्धा हुनेछ । जारी लिगमा १ अंक मात्र जोडेर रेलिगेशन जोनमा रहेको सरस्वती जितविहिन यात्रालाई पुर्णविराम लगाउदै अंक जोड्ने लक्ष्यमा हुनेछ ।

शीर्ष डिभिजनमा रहिरहन सरस्वतीलाई जितको विकल्प छैन । जितले राहत मिल्नेछ । हारले भने रेलिगेसनको जोखिम बढ्ने छ । सरस्वती पहिलो जितको तथा शेर्पा दोस्रो जितको खोजीमा हुनेछ । शेर्पा ७ अंक जोडेर १२औं स्थानमा छ ।