काठमाडौं (हाम्रो खेलकुद)– कुमारी फुटसल र लाकुर फुटसलले तेस्रो संस्करणको महिला प्रिमियर लिग (एमपिएल) फुटसलमा दोहोरो जित निकालेको छ । 

ग्रासरुट रिक्रिएसन सेन्टर, मन्डिखाटारमा शनिबार सुरु भएको महिला प्रिमियर लिग (एमपिएल) फुटसलमा कुमारी र लाकुरले दोहोरो जित निकाल्दा ढुकु फुटसल, फुटसल एरिना, एबीसी र एमयुएफसी नेपाल गल्र्सले समान १–१ जित निकालेका छन् । दि माइथी महिलाज् र बार्सा नेपाल जितबिहीन छ । लिगको पहिलो साता हरेक टिमले समान २–२ खेल खेलेको थियो ।

दोहोरो जितसँगै कुमारी ६ अंक जोडेर शीर्षस्थानमा रहेको छ । लाकुरको पनि समान ६ अंक रहेपनि गोल अन्तरमा दोस्रो स्थानमा रहेको छ । ढुकु, फुटसल एरिना, एबीसी र एमयुएफसी नेपाल गल्र्स समान ४ अंकसहित तेस्रोदेखि छैटौ स्थानमा छ । ढुकु फुटसल, फुटसल एरिना, जितिविहीन एबीसी र एमयुएफसी नेपाल गल्र्स समान २ अंक जोडेर सातौ र आठौं स्थानमा छ ।

कुमारीकी पुजा रानामगर १२ गोलसहित सर्वाधिक गोलकर्ताको सुचीमा अग्रस्थानमा छिन् । कुमारीकै मन्जु दोङ र अनु लामा समान ८ गोलसहित दोस्रो स्थानमा छिन् । दि वि युनाइटेडको आयोजनामा भएको प्रतियोगिताको ६ साता (फागुन १० गते) सम्म चल्नेछ । लिगका खेलहरु खेल हरेक साताको शनिबार हुनेछ ।

लिगमा एबिसी फुटसल, ढुकु फुटसल, बार्सा नेपाल, एमयुएफसी फुटसल, कुमारी फुटसल, लाकुर फुटसल, फुटसल एरेना र दि माइथी महिलाज्ले प्रतिस्पर्धा गर्नेछन् । ८ टोलीले एक अर्कासँग खेल्नेछ । बढी अंक जोड्ने टोली लिग च्याम्पियन बन्नेछ । विजेतालाई नगद पुरस्कार नभई आकर्षक पुरस्कार प्रदान गरिने आयोजकले जनाएको छ । लिगलाई युरोपियन युनियनले मुख्य प्रायोजन गरेको छ ।