काठमाडौं (हाम्रो खेलकुद) – नेपाली राष्ट्रिय पुरुष भलिबल टिम तथा विभागीय त्रिभुवन आर्मी क्लबका स्पाइकर मानबहादुर श्रेष्ठसम्मिलित गुडिस स्पोर्ट्स क्लबले माल्दिभ्सको राष्ट्रिय भलिबल लिगको दोस्रो राउन्डमा सोझो सेटमा हार बेहारेको छ । 

माल्दिभ्सको मालेस्थित सोसियल सेन्टर इन्डोर हलमा शनिबार भएको दोस्रो राउन्डको दोस्रो खेलमा मानबहादुर सम्मिलित गुडिस स्पोर्ट्स क्लब धिवेही सिफेंगे क्लबसँग ३–० को सोझो सेटमा पराजित भएको हो । त्यसअघि गुडिसले दोस्रो राउन्डको पहिलो खेलमा पुलिस क्लबमाथि ३–२ को रोमाञ्चक जित निकालेको थियो ।

एकपक्षीय खेलमा धिवेहीले २५–२१, २५–१७ र २५–१७ को सोझो सेटमा जित निकाल्यो । पहिलो राउन्डमा पनि गुडिस दिवेहीसँग ३–० को सोझो सेटमा पराजित भएको थियो । अब गुडिसले दोस्रो राउन्डको अन्तिम खेलमा स्पोर्ट्स क्लब सिटीसँग खेल्नेछ । मानबहादुरले अघिल्लो सिजन स्पोर्टस् क्लब सिटीबाट खेलेका थिए ।

माल्दिभ्स भलिबल लिगमा सहभागी टिमले दुई विदेशी खेलाडी राख्न पाइने प्रावधान अनुसार मानबहादुर गुडिसमा आबद्ध भएका हुन् ।त्यसअघि शनिबारै भएको दोस्रो राउन्डको खेलमा स्पोर्ट्स क्लब सिटी पुलिस क्लबसँग २५–२२, २६–२४ र २५–२३ को सेटमा पराजित भयो ।

दोस्रो राउन्डमा शीर्ष चार टोलीले प्रतिस्पर्धा गरिरहेका छन् । त्यसपछि वरियताका आधारमा चारै टोलीले सेमिफाइनल खेल्नेछन् । दोस्रो राउन्डको पहिलो र दोस्रो टोलीले पहिलो सेमिफाइनल खेल्नेछन् ।

विजेता टोली फाइनलमा प्रवेश गर्नेछन् । पराजित टोलीले तेस्रो र चौथोबीचको विजेतासँग पुनः सेमिफाइनल खेल्ने अवसर पाउनेछ । विजयी हुने टोली फाइनलमा प्रवेश गर्नेछ । माल्दिभ्सको लिग डिसेम्बर २५ देखि जनवरी १२ सम्म चल्नेछ ।