एजेन्सी – सिजनको पहिलो ‘एल क्लासिको’ अर्थात स्पेनको दुई महारथी बार्सिलोना र रियल मड्रिडबीचको खेल यसअघि नै २६ अक्टोवरमा भइसक्नु पर्ने थियो । बार्सिलोनाको घरेलु मैदान नोउ क्याम्पमा तय भएको खेल क्याटलान क्षेत्रमा भएको आन्तरिक द्धन्द्धका कारण स्थगित हुन पुगेको थियो ।

स्पेनिस फुटबल फेडेरेसन, ला लिगा आयोजकले सुरक्षालाई ध्यानमा राख्दै खेल स्थागित गर्दै नयाँ मिति १८ डिसेम्वरलाई क्लासिकोको नयाँ मिति तोकेको थियो । सोही मिति अनुसार आज राति सिजनको पहिलो ‘एल क्लासिको’ हुदैछ । खेल राति १२ः४५ बजेपछि हुनेछ ।

ला लिगाको खेलहरु मध्यतिर आइपुगेका छन् । दुवै टोलीले समान १६–१६ खेल खेल्दा समान ३५ अंक नै जोडेर शीर्ष दुईमा रहेका छन् । ला लिगाको उपाधिको लागि सम्भवत् यो खेल नै निर्णायक बन्न सक्नेछ । यस्तोमा दुवै टोली खेललाई आफ्नो पक्षमा पार्न रणनीतिमा मैदानमा उत्रने पक्का छ ।

अहिलेको फर्म

बार्सिलोनाले यो सिजन घरेलु मैदानमा कुनै पनि खेल गुमाएको छैन । यद्दपि ला लिगामा बार्सिलोनाले ३ खेल गुमाइसकेको छ । यो सिजन बार्सिलोनाले राम्रो शुरुवात गर्न नसकेपनि आफ्नो पुरानो फर्म फर्काउने प्रयासमा छ ।

यता, रियलले अघिल्लो सिजनको तुलनामा यो सिजन उच्च प्रदर्शन गरिरहेको छ । ला लिगामा एक खेल मात्रै गुमाएको रियलले ५ बराबरी खेलेको छ ।

बार्सिलोनाले यसअघि रियल सोसिडाडसँग २–२ गोलको तथा रियल मड्रिडले भ्यालेन्सियासँग १–१ गोलको बराबरी खेलेको थियो । त्यसैले पनि यि दुई बीचको खेल निकै रोमाञ्चक र प्रतिस्पर्धात्मक हुने अनुमान गर्न सकिन्छ ।

रियलले २०१७ अगस्टमा सुपरकपमा बार्सिलोनालाई २–० ले पराजित गरेयता जित निकाल्न सकेको छैन । त्यसपछि रियल र बार्साबीच ६ खेल हुदा रियलले दुई बराबरीको नतिजा निकाल्दा चारमा हार बेहोरेको छ ।

चोट र प्रतिबन्ध

रियललाई अझै पनि चोटकै पिरलो छ । यसै सिजन क्लबमा अनुबन्ध भएका इडेन हजार्डले भ्यालेन्सियाविरुद्धको खेलमा चोटक बोकेका छन् । मार्सेलो, लुकास भास्क्वेज, जेम्स रोड्रिग्वेज र एसेन्सियो बार्सिलोनाविरुद्धको खेलमा उपलब्ध हुने छैनन् ।

फरल्यान्ड मेन्डीले चोटबाट पूनरागमन गरेका छन् । सम्भवत उनले पहिलो रोजाईमा खेल्न पाउने सम्भावना छ । बार्सिलोनाका औसमाने डेम्वेले र आर्थर चोटका कारण टोलीमा समेटिएको छैन । कुनै पनि खेलाडी प्रतिबन्धमा छैनन ।

बार्सिलोनाको सम्भावित ११

मार्क आन्द्रे टेर स्टेगन, नेल्सन सेमेडो, जेरार्ड पिके, क्लेमेन्ट लिङलेट, जोर्डी अल्वा, इभान राकिटिक, सर्जियो बुस्केटस्, फ्रान्की डि जोङ, लियोनेल मेस्सी (कप्तान) र लुइस सुआरेज ।

रियलको सम्भावित ११

थिवाउट कोर्टुवा, ड्यानियल कार्भाहल, राफयल भरान, सर्जियो रामोस (कप्तान), फरल्यान्ड मेन्डी, लुका मोड्रिच, क्यासमिरो, टोनी क्रुस, रोड्रिगो, भिनिसियस जुनियर र करिम बेन्जेमा ।