पोखरा (हाम्रो खेलकुद) – तीन स्पिनर भुवन कार्की, रोहन मुस्तफा र सन्नी पटेलले उत्कृष्ट बलिङ गरेपछि दोस्रो संस्करणको पोखरा प्रिमियर लिग (पीपीएल) को चौथो खेलमा पोखरा पल्टनले चितवन राइनोजलाई १ सय ८ रनको सामान्य लक्ष्य दिएको छ ।

पोखरा रंगशालामा टस हारेर ब्याटिङ थालेको पोखरा २० ओभरमा अल आउट हुँदै १ सय ७ रनमा समेटियो ।

पोखराका कप्तान शरद भेषावकरले ३९ बलमा ३ चौका र ३ छक्का सहित सर्वाधिक ४५ रनको योगदान दिए । रोहन मुस्तफाको १८ औं ओभरको पाँचौ बलमा स्टेटमा ठूलो सट खेल्ने धुनमा शरद कट एण्ड बोल्ड आउट हुन पुगे ।

दोस्रो ओभरमै बलिङ गर्न आएका स्पिनर सन्नी पटेलले तेस्रो बलमा ओपनर कुशल भुर्तेललाई ५ रनमा एलबी डब्लू आउट गरे । पाँचौ ओभरको अन्तिम बलमा बिक्रम शोबले सन्नी पटेलबाट अर्का ओपनर आशिफ शेखलाई १० रनमा क्याच आउट गराउँदै पेभिलिएन फर्काए ।

आशिफले १५ बलमा २ चौका प्रहार गरे । सुरुवाती देखीनै दबाबमा रहेको पोखराले मध्यक्रम र अन्त्यमा कुनै पनि समयमा खुलेर रन जोड्न सकेन ।

कप्तान पारस खड्काले ११ औं ओभरको चौंथो बलमा पोखरा पल्टनका प्रमुख ब्याट्सम्यान भारतीय रविइन्दर सिंहलाई १० रनमा बोल्ड आउट गरेपछि पोखरा ४३–३ को अवस्थामा पुगेको थियो । रविइन्दरले २३ बलमा १ चौका प्रहार गरे ।

भुवन कार्कीको १२ औं ओभरको अन्तिम बलमा विकेटकीपर विनोद भण्डारी ठूलो सट खेल्ने धुनमा लङ अफमा रोहन मुस्तफाबाट ७ रनमा क्याच आउट हुनपुगे । कमजोर अवस्थामा पुगेको पोखरालाई कप्तान शरद र युबा बायाँ हाते खेलाडी कुशल मल्लले ३६ रनको साझेदारी गर्दै इनिङ उकास्न खोजेका थिए ।

तर १६ औं ओभरको पाँचौ बलमा सन्नीले कुशल मल्ललाई योर्कर बलमा १३ रनमा बोल्ड आउट गरेपछि पोखराको ठूलो योगफलको संभावना सकिएको थियो । कुशलले १२ बलमा २ छक्का प्रहार गरे ।

१७ औं ओभरको दोस्रो बलमा रोहित कुमार पौडेल शून्यमा रन आउट हुन पुगे । प्रथामेश दाके र सर्वतीज लड्डाले खातै खोल्न सकेनन् । राशिद खान १० बलमा १ छक्का सहित १० रनमा क्याच आउट भए ।

सन्नी पटेलले ४ ओभरमा १ मेडन सहित १५ रन खर्चेर २ विकेट लिए । रोहन मुस्तफाले २ ओभरमा २२ रन खर्चेर २ विकेट लिए । भुवन कार्कीले ३ ओभरमा १६ रन खर्चेर २ विकेट लिए । पारस खड्का, करण केसी र बिक्रम शोबले १-१ विकेट लिए ।