काठमाडौं (हाम्रो खेलकुद) – सरस्वती माध्यमिक विद्यालय र वन्डरल्यान्ड इंग्लिस स्कुलले राजधानीमा जारी क्विक्स कप अन्तर विद्यालय छात्र राष्ट्रिय फुटबल प्रतियोगितामा फराकिलो जित निकालेको छ ।

एन्फा मुख्यालय सातदोबाटोमा बुधबार भएको भएको खेलमा सरस्वतीले प्रदेश ६÷७ माथि ८–१ को फराकिलो जित निकालेको हो । सरस्वतीको जितमा सन्दीप धामीले ह्याट्रिक पुरा गरे । अनिष धामी, मनिस कुमार र किरण कुमारले गोल गरे । दुई गोल उपहार पाएको थियो । सरोज नेगीले एक गोल फर्काए ।

अर्काे खेलमा वन्डरल्यान्डले श्रमिक माविमाथि ५–० को फराकिलो जित निकाल्यो । मनिल कन्दङ्वा र निसान गुरुङले समान २–२ तथा साहिल लिम्बुले एका गोल गरे ।

यस्तै नेपालय इंग्लिस पब्लिक स्कुलले गोरखा माविमाथि १–० को जित निकाल्यो । सागर थिङले पहिलो हाफमा गरेको गोल नै निर्णायक बन्यो ।
यस्तै स्मृति बोर्डिङ स्कुलले सिर्जना ज्ञान सागर हाइ स्कुलमाथि ३–२ को जित निकालेको छ । स्मृतिका प्रशान्त सेन, अंकित सिजापति र सदिन केसीले गोल गरे । सिर्जनाका राजन पाण्डे र दिवस अधिकारीले गोल गरे ।

प्रतियोगितामा बिहीबार पनि ४ खेल हुनेछ । छात्रातर्फको खेल ६ देखि १३ डिसेम्वरमा आयोजना हुनेछ । प्रतियोगिताको दुवैतर्फको विजेताले ३ लाख रुपैया हात पार्नेछन् । दोस्रो हुनेले १ लाख ५० हजार, तेस्रोले ७५ हजार तथा चौथो हुनेले ५० हजार रुपैया प्राप्त गर्नेछन् ।