काठमाडौं (हाम्रो खेलकुद) – नेपाल ब्याडमिन्टन संघको आयोजनमा पहिलोपटक संचालन भएको योनेक्स सनराईज नेपाल अन्तराष्ट्रिय च्यालेञ्जमा दिपेश धामी र बिष्णु कटुवालले बुधबार विजयी सुरुवात गरेका छन् ।

दिपेशले भारतका दीपक शर्मामाथि २१–१० र २१–१६ को जित निकाल्दै दोश्रो चरणमा प्रवेश गरेका हुन् । यस्तै बिष्णुले भुटानका निदुप दोर्जीलाई २१–९ र २१–४ को सहज जित निकाले । तर, अपेक्षा विपरित नेपाल नम्वर एक खेलाडी रत्नजित तामाङ र युवा सनसनी प्रिन्स दाहाल पराजित भएका छन् । तामाङ थाइल्याण्डका अदुईराच नामकुलसाग २१–९ र २१–४ को सोझो सेटमा पराजित भए । नविन श्रेष्ठले भने प्रतिद्वन्द्धीबाट वाकओभर प्राप्त गर्दै दोश्रो चरणमा प्रवेश गरेका छन् ।

बिकास श्रेष्ठ र प्रफुल महर्जनले पनि आफुलाई खरो उतार्न सकेनन् । बिकास इंग्ल्याण्डका खेलाडी वाङ युह्वाङसंग २१–१३ र २१–१४ ले तथा प्रफुल भारतका सिद्धार्थ ठाकुरसँग २१–१४ र २१–१० को सोझो सेटमा पराजित भए । अर्का खेलाडी साजन कृष्ण ताम्राकारले भारतीय खेलाडीलाई वाकओभर दिए ।

नेपालका उदियमान खेलाडी प्रिन्स दाहालले पनि नेपालीहरुको विश्वास कायम राख्न असफल भए । दुवई अन्तराष्ट्रिय सेरिज र हालै माल्दिभ्समा सम्पन्न जुनियर च्याम्पियनसिपमा उत्कृष्ट प्रदर्शनका साथ पदक हात पार्न सफल दाहाल च्यालेञ्जमा दोश्रो बरियता प्राप्त रसियाका सर्जी सिरान्तसँग २१– १७ र २१–१२ को सेटमा पराजित भए । यस्तै अन्यसुनिल जोशी र जीवन आचार्य पनि पराजित भए ।

महिलातर्फ पनि नेपाली खेलाडीहरुको प्रदर्शन निराशाजनक नै रह्यो । नजिकै आईरहेको १३ औं दक्षिण एशियाली खेलकुदका लागि तयारीमा रहेको खेलाडीहरुले बिदेशी खेलाडीका सामु टिक्न सकेनन् । महिला युगलतर्फ अमिता गिरी र अनुमाया राईको जोडी भारतका कुहु गर्ग र अनुष्का पारिखसँग २१–१७ र २१–८ ले, पुजा श्रेष्ठ र जेशिका गुरुङ्ग बंगलादेशका अक्तर सप्ला र अलिना सुल्तानसँग २१–९ र २१–१४ ले, निता लम्साल र सिमा राजबंशीको जोडी भारतका मनिषा र रुतापर्ना पन्डासँग २१–१४ र २१–१४ को समान अन्तरले तथा रशिला महर्जन र सिता राईको जोडी भारतकै अपर्ना बलान र त्रिशा जोलीसँग २१–१० र २१–१० को समान अन्तरले पराजित भए ।

२५ हजार डलर पुरस्कार राशी रहेको च्यालेञ्जमा पुरुष तथा महिला एकल र युगल तथा मिश्रीत युगल गरि कुल ५ विधामा नेपाल लगायय २१ राष्ट्रका १४९ खेलाडीहरुले प्रतिस्पर्धा गर्नेछन् । नेपाल ब्याडमिन्टन संघको आयोजना तथा एशिया ब्याडमिन्टन महासंघको तत्वावधानमा संचालित योनेक्स सनराईज नेपाल अन्तराष्ट्रिय च्यालेञ्जको युवा तथा खेलकुद मन्त्री जगतबहादुर सुनार बिश्वकर्माले उद्घाटन गरे