काठमाडौं (हाम्रो खेलकुद) – नेपालका दोस्रो वरीयताका दिपेश धामीसम्मिलित नेपालका दुई जोडी पाकिस्तानमा जारी योनेक्स सनराइज पाकिस्तान इन्टरनेसनल ब्याडमिन्टन सिरिजको मिक्स डबल्समा फाइनलमा प्रवेश गरेका छन् । नेपाली टोली सिरिजको मिक्स डबल्स् र पुरुष डबल्समा फाइनलमा पुग्न सफल भएको हो ।

पाकिस्तान स्पोर्टस् कम्प्लेक्समा शनिबार भएको खेलमा दिपेश र अमिताको जोडीले घरेलु टोली पाकिस्तानका मोहम्मद अली लारोस र गाजला सद्धिकीको जोडीलाई २–१ को सेटमा पराजित गर्दै उपाधि नजिक पुगेको हो ।

दिपेश र अमिताको जोडीले पहिलो सेटमा २१–१५ को सहज जित हात पारेको थियो । दोस्रो सेट १८–२१ ले गुमाएपनि तेस्रो सेटमा २१–१७ को जित निकाल्दै फाइनलमा प्रवेश गरेको हो ।

प्रतियोगितामा शीर्ष वरीयता प्राप्त दिपेश र अमितालेको जोडीले अब उपाधिका लागि आइतबार बिहान माल्दिभ्सका हुसेन जायन शाहिद र फातिमा रजाकको जोडीसँग प्रतिस्पर्धा गर्ने मुख्य प्रशिक्षक सुदिप योन्जनले हाम्रो खेलकुदलाई जानकारी गराए ।

यस्तै मेन्स डबल्समा दिपेश र रत्नको जोडीले पाकिस्तानकै मोहम्मद अतिक र राजा मोहम्मद हसनेनको जोडीलाई २१–१७ र २१–१६  को सोझो सेटमा पराजित गर्दै उपाधिनजिक पुगेको हो ।