काठमाडौं (हाम्रो खेलकुद)-पर्यावरण संरक्षण र स्थानीय रानीकोट गढी प्रचारका लागि भक्तपुरको सूर्यबिनायकमा आयोजना भएको वाकाथन प्रतियोगितामा मुकुन्द पोखरेल प्रथम भएका छन् ।

सुर्यविनायक नगरपालिका वडा नम्बर सातको कार्यालयबाट सुरु भएको वाकाथन प्रतियोगिता खहरे चोक, ठुलो खोला, पिपलडाँडा, घ्याम्पे डाँडा हुँदै रानीकोट पुगेर सकिएको थियो ।

सांसद महेश बस्नेतले उद्घाटन गरेको दौडमा सात किलोमिटरको दूरी ४७ मिनेट १७ सेकेण्डमा पूरा गर्दै गुण्डूका मुकुन्द पोखरेल पहिलो भए । स्थानीय समाजसेवी समूह तथा मान्द्रो परिवारको आयोजना, रेडक्रस सोसाइटी भक्तपुर शाखाको सहयोग तथा सेन्चुरी बैंकको प्रायोजनमा आयोजना भएको वकाथनमा स्थानीय विराज तामाङ दोस्रो र विक्रम केसी तेस्रो भए ।

सो दूरी विराजले ५० मिनेट २९ सेकेण्डमा पूरा गरेका थिए । तेस्रो भएका विक्रमले ५१ मिनेट २१ सेकेण्ड लगाए । ५३ मिनेट२४ सेकेण्डमा दूरी पूरा गरेका मधु खड्का चौथो तथा ५६ मिनेट ५४ मिनेटमा दूरी पूरा गरेका कृष्ण प्रसाद वाग्ले पाँचौं स्थानमा आए ।

वकाथनमा सुरेश बस्नेत छैटौं, विक्रम बस्नेत सातौं, कुमार तामाङ आठौं, महेश्वर गौतम नवौं र प्रमोद देउजा दशौं भए । ५० जनाभन्दा बढीले सहभागिता जनाएका थिए । भक्तपुरको ग्रामिण क्षेत्रमा पर्ने र पर्यटकीय क्षेत्र घ्याम्पेडाँडाको काखैमा रहेको गुन्डुका बासिन्दाले पर्यावरण तथा पर्यटकीय क्षेत्रको प्रचारका लागि गरेको कार्यक्रममा ५० जनाभन्दा बढीले सहभागिता जनाएका थिए ।