पेरिस (एजेन्सी) – युरोपियन च्याम्पियनसिपमा स्पेनको चर्चा नगर्दा त्यो अधुरो हुन सक्छ । पछिल्ला दुई संस्करण जित्ने स्पेनले यसपटक कसरी यात्रा सुरु गर्ला भन्ने विश्व भरका दर्शक उत्सुकतापूर्वक हेरिरहेका छन् । समूह डीमा स्पेनले अहिले ६ः४५ मा चेक गणतन्त्रसँग प्रतिस्पर्धा गर्दैछ ।

स्पेनले पहिलोपटक सन् १९६४ मा घरेलु मैदानमा जितेको थियो । त्यसपछि स्पेनले २००८ मा युरोपियन च्याम्पियनसिप जितेको थियो । स्पेनको फुटबलको स्वर्णिम युग त्यहिबाट सुरु भएको मानिन्छ । २०१० मा विश्वकप जितेको स्पेनले २०१२ युरोपियन च्याम्पियनसिपको उपाधि रक्षाक गरेको थियो । दुई बर्षअघि ब्राजिलमा भएको पछिल्लो विश्वकपमा भने स्पेनको प्रदर्शन विर्सन लायक रह्यो । उपाधि रक्षा गर्नु त कता हो कता टोलीले पहिलो चरण पनि पार गर्न सकेन । त्यहाँबाट पनि स्पेनिस टोलीको स्वर्णिम युगको अन्त्य भएको आलोचकहरु बताउँदै आएका छन् ।

स्पेनका डेभिड सिल्भा ।

यसपटक अन्तिम अभ्यास खेलमा हारेपछि स्पेनको थप आलोचना भएको थियो । तर, स्पेन ओलचकको मुख बन्द गराउन सक्ने टोली हो । फ्रान्समा उपाधि जित्न सके स्पेनका लागि त्यो ठूलो उपलब्धि हुनेछ । पछिल्लो केही दिन यता विवादमा तानिएका गोलकिपर डेभिड डि जियाले स्पेनको पोस्ट सम्हाल्ने भएका छन् । पछिल्लो तीनवटा उपाधि जित्दाका गोलकिपर इकर कासियासको ठाँउ यो खेलमा डि जियाले लिदैछन् । डेभिड सिल्भाका लागि पनि चेकविरुद्धको खेल विशेष हुँदैछ । त्यो खेल उनको स्पेनका लागि सयौं खेल हो ।
चेक गणतन्त्र युरो कपमा पुनरागमन गरेको टोली हो । टोलीका गोलकिपर पिटर केच टोलीको सबैभन्दा चर्चित नाम हो । टोलीका अधिकांश खेलाडी घरेलु लिगमा खेल्नेगर्छन् ।