काठमाडौं (हाम्रो खेलकुद) – भारतका भरत शर्मा र नेपालकी निरा कायस्थ प्रथम ईन्डो नेपाल पिकलबल च्याम्पियनसिपमा मिक्स डबल्समा फाइनल प्रवेश गरेका छन् ।

भरत र निराको जोडीले नेपालका राधेश्याम मचामसी र मन्दिराको जोडीलाई ११–१ र ११–१ को समान अन्तरमा पराजित गर्दै उपाधी निकट पुगेका हुन् । यस्तै अर्को फाईलन प्रवेश गर्ने टोलीमा भारतका भुपेन्द्र र ईन्द्राको जोडी रहेका छन् । उक्त जोडीले निशान्त र रिशुको जोडीलाई ११–१ र ११–० को सेटमा पराजित गरेका छन् ।

सो स्पर्धामा तेश्रो स्थानमा भारतका निशान्त र रिशुको जोडी तेश्रो भयो । उक्त जोडीले नेपालका राधेश्याम मचामसी र मन्दिराको जोडीलाई ११ – ८, ११ – ६ ले पाखा लगायो ।

नेपाल पिकलबल संघको आयोजनामा भएको प्रतियोगितामा पुरुष युगलतर्फ भारतका मुख्त्यारअली र भुपेन्द्रको जोडी सेमिफाईनल प्रवेश गरेका छन् । उक्त टोलीले भारतका नोवो र कुसुमको जोडीलाई ११–० र ११–० को अन्तरले पराजित गरे ।

यस्तै भारतका गौरव र सनिलको जोडी, भरत र विकासको जोडी तथा रञ्जन र महेशको जोडी पनि सेमिफाईनलमा स्थान बनाउन सफल भएका छन् । ग्यालेक्सी स्कुलमा भएको प्रतियोगितामा महिला एकलमा नेपालका विधी क्षेत्री, केञ्जल चित्रकार, एन्जल राई, ममता खड्का, खुस्वु तिवारी आआफ्ना प्रतिद्वन्दिलाई पराजित गर्दै अर्को चरण प्रवेश गरेका छन् । महिला जोडीतर्फ भारतका पुजा र इन्दिराको जोडीले सफलता हात पारेका छन् ।

यसैगरि पुरुष एकलमा भारतका महेशले नेपालका राजेशलाई ११–२ र ११–९ ले तथा भारतका गौरवले नेपालका राधेश्याम मचामसीलाई ११–२ र ११–२ को समान अन्तरले पराजित गर्दै अर्को चरण प्रवेश गरेका छन् ।

प्रतियोगिताको नेपाल ओलम्पिक कमिटिका सचिव एवं नेपाल ब्याडमिन्टन संघका अध्यक्ष रामजी बहादुर श्रेष्ठले उद्घाटन गरेका थिए ।