काठमाडौं (हाम्रो खेलकुद) – सातौं पर्वतीय खेलकुद महोत्सवको अवसरमा नेपाल क्लाइम्बिङ स्पोर्टस् एसोसिएसनले शनिबार नेशनल लिड क्लाइम्बिङ च्याम्पियनसिप आयोजना गर्ने भएको छ ।

पर्वतीय खेलकुद महासंघको सहयोग तथा समन्वयमा ठमेलमा रहेको काठमाडौं स्पोर्टस् क्लाइम्बिङ सेन्टरमा आयोजना हुने प्रतियोगिताको सम्पूर्ण तयारी पूरा भएको आयोजकले जनाएको छ । नेशनल लिड च्याम्पियनसीपमा १३ जना महिला र ३३ जना पुरुष गरी कुल ४६ जना खेलाडीहरुले प्रतिष्पर्धा गर्दैछन ।
प्रतियोगितामा शीर्ष तीन स्थान हात पार्ने खेलाडीहरुले क्रमशः २० हजार, १५ हजार र १० हजार रुपैया हात पार्नेछन् । प्रतियोगितामा दुई विभागीय टिमको सहभागिता रहने छ । यी विभागिय टोलीहरुमा नेपाली सेना र नेपाल स्काउटको चारुमती ओपन स्काउट ट्रप र क्रु रहेका छन् ।

स्पोर्ट क्लाइम्बिङ खेलका मुख्य तिन विधाहरु लिड क्लाइम्बिङ, बोल्डरिङ र स्पिड क्लाइम्बिङमध्ये संघले लिड क्लाइम्बिङ च्याम्पियनसिपको मात्रै आयोजना गर्न लागेको हो ।
यस प्रतियोगिताको लागि रुट तय गर्न संघले अमेरिकी टेक्निकल अफिसियल कुपर मे लाई नियुक्त गरेको छ । प्रमुख जुरीमा संघका केन्द्रिय सदस्य तुल्सिङ गुरुङलाई नियुक्त गरिएको छ । प्रतियोगीतामा विजयी हुने खेलाडीलाई ६ महिनाभित्र हुने कुनै पनि अन्तराष्ट्रिय प्रतियोगितामा भाग लिने अवसर दिइने आयोजकले जनाएको छ ।

साहसिक तथा पर्यटकीय खेलको प्रचुर सम्भावना रहेको नेपालमा नेपाल क्लाइम्बिङ स्पोर्टस् संघ स्थापना भएदेखि नैं स्पोर्टस् क्लाइम्बिङ (वाल क्लाइम्बिङ र रक क्लाइम्बिङ) को प्रतियोगिताहरु गरिरहेको छ ।

स्पोर्ट क्लाइम्बिङ ओलम्पिक अफिसियल खेल हो । जापानमा सन् २०२० मा हुने टोकियो ओलम्पिक र २०२४ को पेरिस ओलम्पिकमा पनि यो खेल समावेश भईसकेको छ । अघिल्लो वर्ष इन्डोनेसियाको जाकार्ता र पालेम्वाङमा आयोजित एसियाडमा पनि स्पोर्ट क्लाइम्बिङमा नेपाली खेलाडीहरुले जुझारु प्रदर्शन गरेका थिए ।

नेपालले हालसम्म दुईवटा अन्तर्राष्ट्रिय प्रतियोगितामा स्पोर्ट क्लाइम्बिङमा सहभागिता जनाएको छ । इन्डोनेसिया एसियाड भन्दा पहिला नेपालले सन् २०१२ मा चिनमा भएका ‘एसिया बिच गेम्स’ मा पनि सहभागिता जनाएको थियो ।