बिर्तामोड (हाम्रो खेलकुद) – प्ले फर डिप्राइभ्ड चिल्डेन नेपाल (पीडिसिएन) को आयोजनामा शुक्रबारदेखि थ्री अन थ्री नेपाल बास्केटबल लिग (एनविएल) इस्ट शुरु हुने भएको छ ।

एनबिएल थ्री अन थ्री इस्ट पुर्वको बिर्तामोड, धरान र बिराटनगरमा भदौं ६ देखि ११ गतेसम्म सञ्चालन हुनेछ ।

नेपाल बास्केटबल लिगको दुई संस्करण र नेपाल महिला बास्केटबल लिगको पहिलो संस्करण सफलतापुर्वक सञ्चालन गरिसकेको पीडिसिएनले बास्केटबललाई विकेन्द्रिकरण गर्ने उद्देश्यसहित यो प्रतियोगिताको आयोजना गर्न आयोजकले जानकारी गराएको छ ।

यि तीन स्थानमा १०–१० टोलीबीच नकआउटका आधारमा पहिलो चरणको प्रतिस्पर्धा गराइनेछ । पहिलो चरणको प्रतियोगितामा तीनै स्थानका पहिलो र दोस्रो हुने टोली बिर्तामोडमा हुने फाइनलका लागि प्रतिस्पर्धा गर्नेछन् । बिर्तामोडमा भदौं १४ गते हुने फाइनलका लागि सहभागि ६ टोलीलाई दुई समुहमा विभाजन गरी लिग कम नकआउटका आधारमा प्रतिस्पर्धा गराईनेछ ।

बिर्तामोडमा प्रकाश लिङ्देन, धरानमा बिकास चाम्लिङ र बिराटनगरमा सरोज लम्सालले सहयोग गर्नेछ । थ्री अन थ्री मा प्रत्येक टोलीमा ४–४ खेलाडी हुनेछ । सबैभन्दा पहिले २१ अंक बटुल्ने टोली बिजयी हुनेछ ।

एनबिएल थ्री अन थ्री वेस्ट पनि यही फर्मयाटमा धनगढी, बुटवल र पोखरामा हुने आयोजकले पत्रकार सम्मेलनमा जानकारी गराएको छ । मिति तय नभइसकेपनि आउदो कात्तिकसम्ममा आयोजना हुने आयोजकले बताएको छ ।

एनबिएल थ्री अन थ्री वेष्टलाई धनगढी प्रिमियर लिगका आयोजक सुबास बहादुर शाहीले सञ्चालन गर्नेछन् । एनबिएल इस्ट र एनबिएल वेष्टपछि उल्लेख्य मात्रामा बास्केटबल खेलाडीको उत्पादन हुने आयोजकले विश्वास लिएको छ ।