काठमाडौं (हाम्रो खेलकुद) – भारतको गुजरातमा जारी छैटौं एसियाली विद्यालय टेबलटेनिस च्याम्पियनसिपमा नेपालको मिक्स डबल्स, ब्वाइज र गल्र्स डबल्र्समा चुनौती सकिएको छ ।

गुजरातमा आइतबार भएको ब्वाइज डबल्र्समा संयोग कपाली र विशाल गोलको जोडी हङकङका सिन विङ हाङ र टिसुन टिसाङको जोडीसँग ३–१ को सेटमा पराजित भएको हो । पहिलो सेट २–११ ले गुमाएको नेपालले दोस्रो सेट ११–९ ले जितेको थियो । तर, त्यसपछिको दुवै सेट नेपालले समान ७–११ ले गुमायो ।

अर्काे खेलमा रुविन महर्जन र सुजन गदालको जोडी पनि हङकङका लाल मिन चाङ र लुङहोक सोको जोडीसँग ११–४, ११–४, १२–१४ र ११–५ को सेटमा पराजित भयो।

गल्र्स डबल्र्समा इभाना थापामगर र वियन्का राईको जोडी चिनिया लु डाल र झियान झिनको जोडीसँग ३–० को सेटमा पराजित भइन् ।

यसअघि नेपालले मिक्स इभेन्टमा एलेन महर्जन र समिरा श्रेष्ठको जोडीले युएईका भिरेश्वर गुरुराज पटिल र दिया थक्करको जोडीलाई ३–१ को सेटमा पराजित गरेको हो । च्याम्पियनसिपमा नेपालको यो पहिलो जित हो ।

यसअघि नेपाली टोली टिम इभेन्टमा गल्र्सतर्फ थाइल्यान्ड, हङकङ र इन्डोनेसियासँग समान ३–० ले तथा ब्वाइजमा थाइल्यान्ड र भारतसँग समान ३–० ले नै पराजित भएको हो ।
अगष्ट १३ देखि २१ तारिखसम्म हुने च्याम्पियनसिपमा अब नेपालले ब्वाइज र गल्र्स सिंगल्स खेल्न बाँकी छ ।

च्याम्पियनसिपमा सहभागी हुन ९ खेलाडीसहित १३ सदस्यीय नेपाली टोली शनिबार भारतको गुजरात प्रस्थान गरेको थियो । टोली प्रमुखमा विशाल खड्का तथा प्रशिक्षकमा पुरुषोत्तम वज्राचार्य, सिक्का सुवाल श्रेष्ठ र एलेक्स महर्जन रहेका छन् ।