काठमाडौं (हाम्रो खेलकुद) – भारतको गुजरातमा जारी छैटौं एसियाली विद्यालय टेबलटेनिस च्याम्पियनसिपको मिक्स डबल्समा संयुक्त अरब इमिरेट्स (युएई)लाई पराजित गरेको छ ।

गुजरातमा शुक्रबार साँझ भएको खेलमा मिक्स डबल्र्समा एलेन महर्जन र समिरा श्रेष्ठको जोडीले युएईका भिरेश्वर गुरुराज पटिल र दिया थक्करको जोडीलाई ३–१ को सेटमा पराजित गरेको हो । च्याम्पियनसिपमा नेपालको यो पहिलो जित हो ।

यसअघि नेपाली टोली टिम इभेन्टमा गल्र्सतर्फ थाइल्यान्ड, हङकङ र इन्डोनेसियासँग समान ३–० ले तथा ब्वाइजमा थाइल्यान्ड र भारतसँग समान ३–० ले नै पराजित भएको हो ।

पहिलो सेटमा ११–८ को जित निकालेको एलेन र समिराको जोडीले दोस्रो सेट ५–११ ले गुमाउन पुगेको थियो । त्यसपछि नेपाली जोडीले तेस्रो र चौथो सेट क्रमशः ११–६ र ११–७ ले पराजित गर्दै च्याम्पियनसिपमा पहिलो जित निकाल्न सफल भएको प्रशिक्षक पुरुषोत्तम बज्राचार्यले हाम्रो खेलकुदलाई जानकारी गराए ।

अगष्ट १३ देखि २१ तारिखसम्म हुने च्याम्पियनसिपमा अब नेपालले ब्वाइज र गल्स डबल्स तथा ब्वाइज र गल्र्स सिंगल्स खेल्न बाँकी छ ।

च्याम्पियनसिपमा सहभागी हुन ९ खेलाडीसहित १३ सदस्यीय नेपाली टोली शनिबार भारतको गुजरात प्रस्थान गरेको थियो । टोली प्रमुखमा विशाल खड्का तथा प्रशिक्षकमा पुरुषोत्तम वज्राचार्य, सिक्का सुवाल श्रेष्ठ र एलेक्स महर्जन रहेका छन् ।