झापा (हाम्रो खेलकुद) – नेपाल खेलकुद पत्रकार मञ्च समन्वय शाखा झापाको अध्यक्षमा हिमाल खरेल निर्वाचित भएको छन् ।

आइतबार बिर्तामोडमा सम्पन्न मञ्चको दोस्रो अधिवेशनले हिमाल खरेलको अध्यक्षमा ११ सदस्यीय कार्यसमिति चयन गरेको हो । अध्यक्ष, सचिव, सहसचिव र कोषाध्यक्ष पदबाहेक अन्य पदमा निर्विरोध निर्वाचित भएको थियो ।

हिमालले अध्यक्षका प्रत्यासी इन्द्रजित मुखियालाई ६ मतले पराजित गर्दै निर्वाचित भए । खरेलले ३२ तथा मुखियाले २६ मत प्राप्त गरे । उपाध्यक्षमा भने अमित खम्बू निर्विरोध निर्वाचित भए । सचिवमा अर्जुन राजवंशील सचित आनन्द सुब्बालाई दुई मतले पछि पारे ।

सहसचिवमा भूमिका सुब्बाले लिलाराज झापालीलाई ८ मतले पछि पारे । भुमिकाले ३३ तथा झापालीले २५ मत ल्याए । कोषाध्यक्षमा राजु पौडेलले ३१ मत ल्याउँदै विजयी भए । उनका प्रतिद्वन्द्वी बुद्ध तामाङले २७ मत ल्याए । तामाङ यसअघिको समितिमा कोषाध्यक्ष पदमा थिए ।

निर्वाचनमा ५९ मतमध्ये ५८ मत खसेको थियो । समितिको सदस्यमा आयुष निरौला, भारती राई, विष्णु श्रेष्ठ, कमल पाण्डे, प्रकाश बानियाँ र तिलक योञ्जन निर्विरोध चयन भए । समितिको बैठकले अन्य दुई जनालाई सदस्यमा मनोनित गर्ने प्रावधान छ ।

२०६६ सालदेखि निरन्तर नेतृत्व सम्हालेका अध्यक्ष रमेश समदर्शी राईको अध्यक्षतामा भएको अधिवेशनमा मञ्चका केन्द्रीय अध्यक्ष देवेन्द्र सुवेदी, पूर्व अध्यक्ष अजय फुयाल लगायतको उपस्थिति थियो ।