काठमाडौं (हाम्रो खेलकुद) – ब्रिटिस स्कुलकी साम्भवी पाल्लकले काठमाडौं ब्याडमिन्टन च्याम्पियनसिप (स्कुलस्तर) २०१९ मा दोहोरो उपाधि हात पार्न सफल भएकी छिन् ।

पाल्लकले छात्रा यु – १२ र यु – १४ दुवै तर्फ जित हात पार्दै दोहोरो उपाधी चुमेकी हुन् । पाल्लकले यु–१२ मा ग्यालेक्सी स्कुलकी शेरा जे शेर्पालाई २१–२ र २१–७ ले तथा यु–१४ मा ग्यालेक्सीकै निमा यान्जी शेर्पालाई २१–१० र २१–४ ले पराजित गर्दै दोहोरो उपाधि जित्न सफल भएकी हुन् ।

काठमाडांै जिल्ला ब्याडमिन्टन संघको आयोजनामा भएको प्रतियोगिताको छात्र यु–१२ मा भ्याली भ्यू स्कुलका सक्षम ढकालले बौद्ध ईन्टरनेशनलका ककेश सत्याललाई २१–१३ र २१–५ ले पन्छाउँदै उपाधी हात पारे ।

छात्रकै यु–१४ मा क्यारिबियनका डेभिड थापा मगरले काठमाडौं मेरिडियनका अभियान कश्यपलाई २१– १३ र २१–१० ले पाखा लगाउँदै उपाधी चुमे ।

सोही अवसरमा ब्याडमिन्टन खेलको विकास र विस्तारमा प्रशिक्षकको भूमिका निर्वाह गरेका प्रशिक्षक महेन्द्रलाल श्रेष्ठलाई कदर पत्र र नगद १० हजार बाट जिल्ला संघले सम्मान गरेको थियो । उनलाई प्रमुख अतिथि नेपाल ओलम्पिक कमिटिका अध्यक्ष संघिय प्रतिनिधी सभाका माननिय साँसद जीवन राम श्रेष्ठले कदर पत्र प्रदान गरेका थिए ।

विजयी खेलाडीहरुले मेडल, प्रमाण पत्रका साथै यु–१४ तर्फ पहिलो, दोश्रो र तेश्रोले क्रमशः नगद ३० हजार, १५ हजार र १० हजार तथा यु–१२ तर्फका खेलाडीले नगद २०, १५ र १० हजार प्राप्त गर्नेछन् । नगद पुरस्कार खेलाडीहरुलाई बिशेष कार्यक्रमको आयोजना गरि पछि प्रदान गरिने आयोजक संघका अध्यक्ष दीपक थापाले जानकारी गराए ।

विजयी खेलाडीहरुलाई प्रमुख अतिथी संसद तथा नेपाल ओलम्पिक कमिटिका अध्यक्ष जीवनराम श्रेष्ठ, नेपाल ब्याडमिन्टन संघका अध्यक्ष रामजीबहादुर श्रेष्ठ, नेपाल तेक्वान्दो संघका उपाध्यक्ष संजीव रेग्मी, ओलम्पियन दीपक बिष्ट र नेपाल राष्ट्रिय तथा अन्तराष्ट्रिय खेलाडी संघका अध्यक्ष दीपक श्रेष्ठले मेडल, प्रमाण पत्र प्रदान गरेका थिए ।