काठमाडौं (हाम्रो खेलकुद) – काठमाडौं मेरिडियनका अभियान कस्यप र क्यारिवियनका डेभिड थापा मगर काठमाडौं ब्याडमिन्टन च्याम्पियनसिप स्कुल स्तरिय प्रतियोगिताको उपाधि नजिक पुगेका छन् ।

काठमाडौं जिल्ला ब्याडमिन्टन संघको आयोजनामा किर्तिपूरस्थित अडिटोरियमहलमा भएको च्याम्पियनसिपको छात्र यु – १४ मा अभियानले ग्यालेक्सी स्कुलका निकेश पोखरेललाई २१–१३ र २१–१८ ले तथा डेभिडले केएमसीका प्रत्याकलाई २१–१६ र २१–७ ले पराजित गर्दै उपाधी निकट पुगेका हुन् ।

स्कुल टु ओलम्पिक भन्ने नारालाई आत्मसाथ गर्दै स्कुल स्तरदेखिनै खेलाडी उत्पादन गर्ने उद्धेश्यले आयोजना गरिएको प्रतियोगिताको छात्रातर्फ ब्रिटिस स्कुलकी साम्भवी पालक र ग्यालेक्सी स्कुलकी निमा यान्जी शेर्पा पनि फाईनल प्रवेश गरेका छन् । पालकले क्यानभासकी ईमेक लुना लावतीलाई २१–९ र २१–६ ले तथा शेर्पाले पाँगा स्कुलकी सोफिया महर्जनलाई २१–१० र २१ – १२ ले पराजित गरे ।

यस्तै यु–१२ छात्रतर्फ भ्याली भ्यूका संक्षम ढकाल र बुद्ध ईन्टरनेशनलका ककेश सत्याल पनि फाईनल प्रवेश गरे । ढकालले लिशा स्कुलका श्रेयास रन्जितकारलाई २१–१२ र २१–८ ले तथा सत्यालले एनएमई का विश्वास बुढाथोकीलाई २१–१३ र २१–१६ ले पराजित गर्दै उपाधी भिडन्त पक्का गरेका हुन् ।

यस्तै छात्रातर्फ ब्रिटिस स्कुलकी साम्भवी पालक र ग्यालेक्सी स्कुलकी श्रेया जे. शेर्पाले पनि उपाधी भिडन्त गर्ने भएका छन् । पालकले सेन्ट जेभियरका प्रनिषा श्रेष्ठलाई २१–७ र २१–४ तथा शेर्पाले केन्द्रिय बिद्यालयकी प्रिशा सिंहलाई २१–७ र २१–८ ले पराजित गर्दै उपाधी निकट पुगेका हुन् ।

प्रतियोगिताको फाइनल शुक्रबार हुनेछ ।