काठमाडौं (हाम्रो खेलकुद)– रेगन श्रेष्ठ र राजेन लामा सर्वाधिक धनराशिको ‘प्रथम चामुन्डा अल नेपाल स्नुकर च्याम्पियनसिप’को फाइनलमा प्रवेश गरेका छन् ।

बौद्धस्थित चामुन्डा स्पोर्टस् क्लबको स्नुकर हाउसमा जारी प्रतियोगितामा रेगन श्रेष्ठले सोम लामालाई तथा राजेनले निर्मान बोगटीलाई पराजित गर्दै फाइनल यात्रा तय गरेको हो ।

पहिलो सेमिफाइनलमा रेगनले सोम लामालाई ६–१ को फ्रेममा हराउदै उपाधि नजिक पुगे । दोस्रो सेमिफाइनलमा राजेनले साकुरा ओपनका च्याम्पियन निर्मानलाई ६–१ कै फ्रेममा हराउदै फाइनलमा रेगनसँगको भेट पक्का गरे । फाइनल शनिबार बिहान हुनेछ । यस प्रतियोगिताबाट खेलाडीहरुले आफ्नो वरीयता प्राप्त गर्नेछ ।

२२ असारबाट शुरु भएको च्याम्पियनसिपमा देशभरबाट करिव १ सय ५० खेलाडीको सहभागिता रहेको छ । च्याम्पियनसिपको विजेताले २ लाख रुपैया हाता पर्नेछन् । दोस्रो हुनेले ७५ हजार तथा तेस्रो हुने २ जनाले ३०–३० हजार रुपैया पाउनेछन् ।

च्याम्पियनसिपको उत्कृष्ट खेलाडीले १० हजार रुपैया प्राप्त गर्नेछन् । यस्तै हाइएस्ट ब्रेक ७५ स्कोर पार गर्नेलाई ३० हजार र सेन्चुरी ब्रेकले ५० हजार रुपैया पाउनेछन् । च्याम्पियनसिपको शीर्ष १६ खेलाडीलाई मेडल, ट्रफी, प्रमाणपत्र र गिफ्टह्याम्पर प्रदान गरिनेछ ।

प्रतियोगितामा अनुमानित रकम करिव १७ लाख रुपैया रहेको छ । च्याम्पियनसिपलाई नेपाल विलियर्ड स्नुकर तथा पुल संघले सहयोग गरेको छ ।