दिपक न्यौपाने (बुटवल) – बुटवल देबिनगरमा क्वीक्स कप जिल्ला स्तरीय अन्तर बिद्यालय छात्र तथा छात्रा नकआउट फुटबल प्रतियोगिता अर्काे सातादेखि आयोजना हुने भएको छ ।

जिल्ला फुटबल संघ रुपन्देहीको आयोजनामा बुटवल देबिनगरस्थित एन्फा टेक्निकल सेन्टरमा हुने प्रतियोगितामा करिव जिल्ला भरका ४० बिद्यालयसहभागि हुने अनुमान गरिएको छ । प्रतियोगिता ८ साउनबाट आयोजना हुदैछ।

छात्रतर्फ जिल्लाको विजेतालाई ३० हजार उपविजेतालाई १५ हजार तथा छात्रा तर्फ विजेतालाई १० हजार र उपविजेतालाई ५ हजार रुपैंया नगद पुरस्कार सहित ट्रफी, पदक र प्रमाणपत्र प्रदान गरिने प्रतियोगिताका संयोजक तथा जिल्ला फुटबल संघ रुपन्देहीका उपाध्यक्ष हरि क्षेत्रीले हाम्रो खेलकुद डटकमलाइ जानकारी दिए ।

त्यस्तै प्रतियोगितामा छात्रतर्फ उत्कृष्ट गोलकिपर, डिफेन्स, मिडफिल्डर, फरवार्ड र हाई स्कोररलाई जनही नगद २ हजार प्रदान गरिने छ । छात्रातर्फ उत्कृष्ट खेलाडी र ५ गोल भन्दा बढी स्कोर गर्नेलाई जनही नगद २ हजार रुपैंया पुरस्कार प्रदान गरिने छ । बिहान र साझ गरी दिनमा ४ वटा खेल खेलाइने बताइएको छ ।

जिल्लामा विजेता हुने टिम प्रदेश हुदै केन्द्रमा प्रतिस्पर्धा गर्न पाउने बताइएको छ । प्रदेशमा पनि विजयी भएको टिम राष्ट्रिय प्रतिस्पर्धामा सहभागि हुने प्रतीयोगीता संयोजक क्षेत्रीले बताए ।

केन्द्रमा बिजयी हुने टिमले ३ लाख रुपैंया नगद सहित अन्य पुरस्कार प्राप्त गर्ने बताइएको छ भने उपबिजेताले एक लाख पचास हजार प्राप्त गर्नेछन । यस्तै तेस्रो हुने टिमलाइ ७५ हजार तथा चौथो हुने टिमलाइ ५० हजार प्रदान गरिनेछ । साथै प्रतीयोगीताको छात्र तथा छात्रातर्फ उत्कृष्ट गोलकिपर, डिफेन्स, मिडफिल्डर, फरवार्ड र प्रशिक्षकहरुलाइ पनि आर्कषक पुरस्कारसहित नगद ५ हजार प्रदान गरिने छ ।