काठमाडौं (हाम्रो खेलकुद) – उपाधिको दावेदारको रुपमा रहेको समृद्धि गोरिल्लाजले राजधानीमा जारी वुमेन्स नेपाल बास्केटबल लिगमा लगातार चौथो जित जित निकालेको छ ।

टाइम्स इन्टरनेनल कलेज चारखालमा मंगलबार बिहान भएको खेलमा समृद्धि गोरिल्लाजले विभागीय नेपाल पुलिस क्लबलाई ३९–३५ ले पराजित गर्दै लिगमा अपराजित यात्रा कायम गर्न सफल भएको हो । पुलिसको यो दोस्रो हार हो । यसअघि पुलिस समृद्धिसँग नै पराजित भएको थियो ।

निकै नै रोमाञ्चक र प्रतिस्पर्धात्मक बनेको खेलको पहिलो क्वाटरमा समृद्धिले ९–५ को अग्रता बनाएको थियो । दोस्रो क्वाटरमा ८–९ ले पछि परेको समृद्धिले तेस्रो क्वाटरमा पुन १३–९ को अग्रता लिदै जिततर्फ अग्रसर बनेको थियो । चौथो क्वाटरमा ९–१२ ले पछि परेपनि अघिल्लो क्वाटरमा लिएको अग्रता समृद्धिको जितमा पर्याप्त बन्यो ।

समृद्धिको जितमा राष्ट्रिय टोलीकी समेत कप्तान रहेकी सदिना श्रेष्ठले ११ अंकको योगदान दिइन् । उनले १० रिवाउन्ड, ३ असिस्ट र एक ब्लकसमेत गरे ।

लिगमा दुई खेल बाँकी रहँदा समृद्धि ४ खेलबाट ८ अंक जोडेर शीर्षस्थानमा छ । समान खेलबाटै पुलिस ६ अंक जोडेर दोस्रो स्थानमा रहेको छ । आइएसओ काइट तेस्रो तथा साइपाल चौथो स्थानमा छ ।