काठमाडौं (हाम्रो खेलकुद) – प्ले फर डिप्राइभ्स चिल्ड्रेन (पीडिसिएन) ले पहिलोपटक आयोजना गर्न लागेको महिला बास्केटबल लिग (डब्लुएनबीएल) लिगमा चार टोलीको सहभागिता रहने भएको छ ।

आयोजक पीडिसिएनले शनिबारदेखि शुरु हुने प्रतियोगितामा चार टोलीको सहभागिा रहेको जानकारी गराएको हो । आयोजकले यसअघि ५ टोलीबीच प्रतिस्पर्धा हुने जानकारी गराएपनि शुक्रबार चार टोलीको मात्रै सहभागित जनाएको पीडिसिएनका अध्यक्ष अरुण कार्कीले जानकारी गराए ।

लिगमा चार टिमले राउण्ड रोविनका आधारमा प्रतिस्पर्धा गर्नेछन् । महिला लिगमा विभागीय टोली नेपाल पुलिस, समृद्धि गोरिल्लाज, साइपाल एकेडेमी र आइएसओ काइट्सले प्रतिस्पर्धा गर्नेछन् । लिगपछि शीर्ष दुईमा रहने टिमले फाइनल खेल्ने छन् ।

सहभागी टिमले १४ खेलाडी राख्न पाउनेछन् । जसमा एक टिमले ४ विदेशी खेलाडी राख्न पाउने प्रावधान राखिएपनि एक खेलमा २ विदेशी खेलाडी एकै पटक खेलाउन पाउनेछन् ।

पीडिसिएनकै आयोजनामा गत बैशाख १४ गतेदेखि पुरुषको लिग सञ्चालन भइरहेको छ । लिग चरणको मात्रै खेल बाँकी छ । अध्यक्ष कार्कीले पुरुषहरुको लिग राम्रो भइरहेका कारण महिला लिग आयोजना गर्न लागेको हो र महिला लिग पनि राम्रो र सफल हुने अपेक्षा गरे ।

राष्ट्रिय टिम तथा गोरिल्जासकी कप्तान सदिना श्रेष्ठले यस्तो लिगले महिला बास्केटबलमा धेरै सहयोग पुग्ने बताइन् । सदिनाले डेढ वर्षपछि राष्ट्रिय खेलाडीले केही समयअघि आठौं राष्ट्रिय खेलकुदमा खेलेको अनुभव सुनाउँदै राष्ट्रिय खेलाडीको लागि कुनै प्रतियोगिता नै नभएको बताइन् ।

क्लबहरुले आयोजना गर्ने प्रतियोगितामा राष्ट्रिय खेलाडीले खेल्न नपाउने नियममा कारण महिला खेलाडीले आफ्नो खेल कौशल देखाउन नपाएकोे अवस्थामा पीडीसिएनले सबैलाई खेल्ने बाटो खोलेको बताउदै धन्यवाद व्यक्त गर्दै सबै सहभागी टोलीलाई जितको शुभकामना दिइन् ।