काठमाडौं (हाम्रो खेलकुद) – टाइम्स इन्टरनेसनल कलेजले राजधानीमा होम एन्ड लिगको आधारमा जारी क्वीक्स नेपाल बास्केटबल लिगमा पहिलो हार बेहोरेको छ ।

टाइम्सले साविकको उपविजेता त्रिभुवन आर्मी क्लबसँग १ अंकको अन्तरमा पराजित हुदै लिगमा पहिलो हार बेहोरेको हो ।

आर्मीको कोर्ट भद्रकालीमा भएको प्रतिस्पर्धात्मक खेलमा टाइम्स ६७–६६ को अन्तरमा पराजित भएको हो । यसअघि टाइम्सले घरेलु मैदानमा आर्मीलाई अतिरिक्त समयमा २३–१६ को अग्रता लिदै १०३–९६ को अन्तरमा पराजित गरेको थियो ।

निकै नै रोमाञ्चक र प्रतिस्पर्धात्मक बनेको खेलको पहिलो क्वाटरमा आर्मीले २०–१९ को लिएको थियो । दोस्रो क्वाटरमा दोस्रो क्वाटरमा टाइम्स १५–१४ ले अग्रता लिदा खेल ३५–३५ को बराबरीमा पुगेको थियो । तेस्रो क्वाटरमा आर्मीले पुनः १६–१३ को अग्रता लिएको थियो ।

निर्णायक क्वाटरमा टाइम्सले १९–१७ को अग्रता लिएपछि समग्रमा हार टार्न सकेन । आर्मीको जितमा विनोद महर्जनले २३ स्कोर गरे । उनले ५ रिवाउन्ड, ३ स्टिल र २ असिस्ट गरे । उनी नै खेलको म्यान अफ दि म्याच घोषित हुदै ३ हजार रुपैया पाए ।

जितसँगै आर्मीं लिगको दोस्रो स्थानमा उक्लिएको छ । २ खेल बाँकी रहँदा टाइम्स २३ अंक जोडेर शीर्षस्थानमा रहँदा ३ खेल बाँकी रहेको आर्मीको २१ अंक पुगेको छ । बुढानिलकण्ठ २० अंकसहित तेस्रो स्थानमा छ ।