काठमाडौं (हाम्रो खेलकुद) – दोस्रो संस्करणको अन्नपूर्ण म्याराथन यसै महिना आयोजना हुने भएको छ ।

आयोजक अन्नपूर्ण काठमाडौं समाजले मंगलबार राजधानीमा पत्रकार सम्मेलनको आयोजना गर्दै दोस्रो संस्करणको म्याराथन अन्नपूर्ण सेन्चुरी पर्यटन महोत्सवको अवसरमा जुन ३ अर्थात जेठ २० गते हुने जानकारी गराएको हो ।

म्याराथन सन् १९५० जुन ३ मा फ्रान्सेली पर्वतारोही मौरिस हार्जाेगको टोलीले अन्नपुर्ण हिमालमा पहिलोपटक पाइला टेकेको दिनलाई अन्नपुर्ण आरोहण दिवसको अवसर पारेर आयोजना गर्न लागेको हो ।

म्याराथनमा नेपाली र विदेशी गरी करिव १ सय जना खेलाडीहरुले सहभागिता जनाउने प्रतियोगिता सह–संयोजक ऋषि भण्डारीले जानकारी गराए ।

दोस्रो संस्करणमा महिलाको प्रतिस्पर्धा राख्न नसकिएको संयोजक भण्डारीले बताए । काठमाडौंबाट सहभागी हुने खेलाडीलाई आउने, जाने लगायतको सम्पूर्ण खर्च आयोजकले बेहोर्ने छन् ।
म्याराथन अन्नपूर्ण आधार शिविरबाट सुरु भई माछापुच्छ्रे आधार शिविर, वगर, देउराली, हिमालय, दोभान, सिनुवा, भनुवा, छोम्रोङ, घुर्जुङ, टाढापानी हुँदै घान्द्रुक आएर सकिने छ ।

म्याराथनको विजेताले १ लाख ५ हजार रुपैया पुरस्कार पाउनेछन् । त्यस्तै दोस्रोले ७५ हजार र तेस्रो हुनेले ५५ हजार रुपैयाँ प्राप्त गर्ने आयोजकले जनाएको छ । चौथो देखि दशौसम्मले ११ हजारदेखि ५ हजार रुपैया पाउनेछ ।

नेपाली खेलाडीका लागि १ हजार रुपैया र विदेशीका लागि ३५० डलर दर्ता शुल्क तोकिएको छ ।
म्याराथन र महोत्सवको उद्घाटन युवा तथा खेलकुद मन्त्री जगत बहाखुर सुनार र समापन पूर्व प्रधानमन्त्री शेर बहादुर देउवगाले गर्नेछन् ।

पहिलो संस्करणमा आर्मीका हरि कुमार रिमाल च्याम्पियन बनेका थिए ।