धनगढी (हाम्रो खेलकुद) – एसटिएस टेलिभिजन र रेडियो धनगढी नेपाल आईस मिडिया कप फुटसल प्रतियोगिताको समूह विजेताको रुपमा सेमिफाइनलमा प्रवेश गरेको छ ।

समूह चरणको अन्तिम खेलमा सोमबार एसटिएस टेलिभिजनले अनुमोदनलाई ११–० को फराकिलो अनतरले पराजित गर्दै समूह विजेता बनेको हो । एसटिएसको फराकिलो जितमा योगेन्द्र नायकले ५, सागर शाहले ४ तथा दिनेश विष्ट र समिर विष्टले समान १ गोल गरे ।

तीन खेलमा लागातार जित हात पारेको एसटिएसको नौ अंक रहेको छ । एसटिएसले लिगको अन्तिम खेलमा मंगलबार डेलीपाटीसँग खेल्नेछ ।

रेडियो धनगढी समुह बी को विजेता बन्दा बी टिभीलाई ७–१ ले हरायो । धनगढीका लागि लोक कार्कीले ५ तथा प्रकाश छेडालले २ गोल गरे । बी टिभीका लागि नवराज धानुकले एक गोल फर्काए ।

नेपाल खेलकुद पत्रकार मञ्च कैलाली जिल्ला समन्वय शाखाको आयोजनामा जारी नेपाल आईस मिडिया कप फुटसल प्रतियोगिताको तेस्रो दिन भएको दोस्रो खेलमा भने सुदुर सन्देशले सान्त्वना जित हात पारेको छ ।

सुदुर सन्देशले दिनेश एफएमलाई ५–० ले हराएको हो । यसअघिको एक खेलमा हार र एकमा बराबरी गरेको सुदुर सन्देश चार अंक भएपनि प्रतियोगिताबाट बाहिरिएको छ । दिनेश एफएम पनि तीन खेलमा पराजित हुँदै अंक विहीन बन्यो ।

पश्चिम टुडेले सेमिफाइनल पुग्ने सम्भावनालाई वलियो बनाएको छ । पश्चिम टुडेले डेलीपाटी डटकमलाई ११–३ ले हरायो । प्रतियोगिता अन्तर्गत मंगलबार पनि लिग चरणका अन्तिम चार खेल हुनेछन ।