पोखरा (हाम्रो खेलकुद) – नेपाल खेलकुद पत्रकार मञ्च गण्डकीले आयोजना गर्न लागेको ‘टिभिएस अपाचे चौथो पोखरा स्पोर्टस अवार्ड–२०७५’ अन्तर्गत खेल पत्रकारिता अवार्डमा पुरस्कार राशि वृद्धि भएको छ ।

यस्तै खेलाडीका लागि प्रदान गर्ने अवार्डमा समेत पुरस्कार राशि वृद्धि गरिएको छ । यसवर्ष थपिएको विधा वर्ष चर्चित खेलाडीसहित विभिन्न ८ विधामा अवार्ड दिइनेछ ।

मञ्चको बैठकले खेल पत्रकारिता अवार्ड प्राप्त गर्ने एकजना पत्रकारलाई नगद २० हजारसहित अवार्ड प्रदान गरिने निर्णय गरेको हो । गत वर्ष खेल पर्यटन पत्रकारिता अवार्ड प्राप्त गरेका पत्रकार सन्तोष पोखरेलले नगद १५ हजारसहित अवार्ड प्राप्त गरेका थिए ।

यस्तै, वर्ष चर्चित खेलाडी, वर्ष उदियमान खेलाडी र वर्ष प्रशिक्षकलाई जनही २५ हजार रुपैयाँसहित अवार्ड प्रदान गरिनेछ । वर्ष चर्चित खेलाडी विधा यस वर्ष थप भएको हो भने उदियमान खेलाडी र वर्ष प्रशिक्षकको राशिमा १० हजार वृद्धि गरिएको हो । वर्ष उत्कृष्ट खेल संघलाई नगद १५ हजारसहित सम्मान गरिनेछ । गत वर्ष १० हजारमात्र थियो ।

पोखरा सभागृहमा २४ जेठमा हुने स्पोर्टस् अवार्डको सबैभन्दा महत्वपूर्ण विधा वर्ष खेलाडी पुरुष र वर्ष खेलाडी महिला को बन्ला भन्ने रोचक छ । मञ्चले वर्ष खेलाडी पुरुषलाई टीभीएस अपाचे मोटरसाइकल र वर्ष खेलाडी महिलालाई विगो स्कूटरसहित अवार्ड प्रदान गर्नेछ । सोको प्रायोजन बतास ब्रदर्श प्रालिले गरेको छ ।

यस्तै, लामो समय खेल क्षेत्रमा समर्पित व्यक्तिलाई लाइफटाइम अचिभमेन्ट अवार्ड प्रदान गरिनेछ । सो अवार्ड चाँदीजडित हुने मञ्च उपाध्यक्ष एवं फ्रेम संयोजक रञ्जन अधिकारीले बताए । गत वर्षका वर्ष खेलाडी कमल भण्डारी र बिमला नेपाली हुन् ।