काठमाडौं (हाम्रो खेलकुद) – साविकको उपविजेता विभागीय त्रिभुवन आर्मी क्लबले होम एण्ड अवे लिगको आधारमा राजधानीमा जारी क्वीक्स नेपाल बास्केटल लिगमा अर्काे विभागी टोली नेपाल पुलिस क्लबलाई पराजित गरेको छ ।

शनिबार भएको खेलमा आर्मीले पुलिसलाई ७५–६७ ले पराजित गरेको हो । निकै नै प्रतिस्पर्धात्मक बनेको खेलको पहिलो क्वाटरमा आर्मी १६–१७ ले पछि परेको थियो । दोस्रो क्वाटरमा आर्मीले २२–१६ ले अग्रता लिदा तेस्रो क्वाटरमा पुनः १६–१७ ले नै पछि परेको थियो । तर, अन्तिम सेटमा आर्मीले २१–१७ को अग्रता बनायो ।

आर्मीको जितमा आयुस सिंहले २० अंक जोडे । उनी नै खेलको म्यान अफ दि म्याच घोषित भए । उनले ३ हजार रुपैया पाए ।

शनिबारकै अर्काे खेलमा एएनके कीर्तिपुर बास्केटबल टिमले दि रोयल बास्केटबल क्लबमाथि ६३–६१ को कठिन जित निकाल्यो । शुरुका तीनै क्वाटरमा पछि परेको कीर्तिपुरले अन्तिम क्वाटरमा २४–८ को अग्रता लिदै जित निकाल्न सफल भएको हो ।

कीर्तिपुर पहिलो क्वाटरमा २२–१२, दोस्रोमा १३–१२ र तेस्रोमा १८–१४ ले पछि परेको थियो । कीर्तिपुरको जितमा सागर थापाले १२ अंकको योगदान दिए । उनी नै खेलको म्यान अफ दि म्याच घोषित भए । उनले ३ हजार रुपैया पाए ।

जितसँगै आर्मी ९ खेलबाट १७ अंक जोडेर शीर्षस्थानमा रहेको छ । दुई खेल कम खेलेको टाइम्स १४ अंक जोडेर दोस्रो स्थानमा यथावत छ । ७ र ८ खेल खेलेको गोल्डेनगेट र बुढानिलकण्ठ समान ११ अंकसहित तेस्रो र चौथो स्थानमा रहँदा ७ खेल खेलेको पुलिस १० अंक जोडेर पाचौ स्थानमा रहेको छ ।

प्रतियोगितामा आइतबार बुढानिलकण्ठ र दि रोयल बास्केटबल क्लब तथा बीएमसी साउथ साइडर्स गोल्डेनगेट कलेजबीच खेल हुनेछ ।