काठमाडौं (हाम्रो खेलकुद) – शंखडोल डोजो र अन्तर्राष्ट्रिय कराँते खेलाडी विजय लामाले करातेका राष्ट्रिय तथा अन्तर्राष्ट्रिय खेलाडी र बौद्ध टुसाल भेट्रान्स समुहका खेलाडीलाई शुक्रबार सम्मानित गरेका छन् ।

विजयले आफ्नै पहलमा शंखडोल डोजोसँगको सहकार्यमा कराँतेका तीन खेलाडीलाई नगद र मायाको चिनोसहित तथा बौद्ध टुसाल भेट्रान्स समुहका १२ जना खेलाडीलाई ट्याकसुट र खादा ओढाएर सम्मानित गरेका हुन् ।

उनीहरुलाई खेलाडी लामासहित काठमाडौं क्षेत्र नम्वर ३ का सांसद कृष्ण बहादुर राई र समाजसेवी तुलसी पौडेलले सम्मानित गरे । कराँतेतर्फ आठौं राष्ट्रिय खेलकुदका स्वर्णधारी मन्डेकाजी श्रेष्ठ र आठौंकै स्वर्णधारी सोनाम लामा र सोनाम लामालाई जनही ५–५ हजारसहित सम्मानित भए ।

मन्डेकाजी पाँचौ, छैटौ र आठौंमा स्वर्ण जित्न सफल भएका हुन् । उनी नेपाल राष्ट्रिय तथा अन्तर्राष्ट्रिय खेलाडी संघका सहमहासचिव समेत हुन् । यस्तै पुलिसबाट व्यवसायिक खेल खेलिरहेका सोनामले छैटौ र सातौमा स्वर्ण जित्न सफल भएका थिए । यस्तै अर्का सोनाम लामाले आठौंमा स्वर्ण जित्न सफल भएका थिए ।

यस्तै बौद्ध टुसाल भेट्रान्स समुहका सुरज लामा, दावा लामा, कृष्ण लामा, इन्द्र लामा, बासु अवाल, धर्मेन्द्र लामा, विसन लामा, सजिन लामा, सुनिल लामा, विवेक लामा, उमेश लामा र अमर लामा सम्मानित भए ।

दुई एसियाली खेलकुद इन्चोन एसियाड र जाकर्ता एसियाडमा सहभागिता जनाइसकेका विजय लामा पछिल्लो समय खेलसँगै सामाजिक कार्यमा सक्रिय रहँदै आएका छन् । विजयले जकार्ता एसियाडमा पनि कराते टिमलाई ट्याकसुट प्रदान गरेको थियो ।

छैटौ राष्ट्रिय खेलकुदमा कास्य जितेका २४ वर्षीय विजयले सातौमा स्वर्ण जितेपनि आठौंमा सहभागिता जनाएको थिएन । उनले नेपालमै हुने १३औं दक्षिण एसियाली खेलकुद (साग)मा स्वर्ण जित्ने लक्ष्य रहेको बताएका छन्