काठमाडौं (हाम्रो खेलकुद) – साविकको उपविजेता विभागीय त्रिभुवन आर्मी क्लब होम एण्ड अवे लिगको आधारमा राजधानीमा जारी क्वीक्स नेपाल बास्केटल लिगको शीर्ष स्थानमा उक्लिएको छ ।

बिहीबार भएको खेलमा आर्मीले बुढानिलकण्ठलाई ७९–६४ को अन्तरमा पराजित गरेपछि शीर्षस्थानमा उक्लिएको हो । आर्मीको ८ खेलबाट १५ अंक पुगेको छ । एक खेल कम खेलेको टाइम्स इन्टरनेसनल कलेज १४ अंकसहित दोस्रो स्थानमा छ ।

पहिलो क्वाटर १८–१८ को बराबरीमा सकिएको थियो । दोस्रो क्वाटरमा आर्मीले २४–८ को फराकिलो अग्रता लिन सफल भयो । तेस्रो क्वाटरमा आर्मी १७–२३ ले पछि परेपनि चौथो क्वाटरमा २०–१५ को जित निकाल्दै आर्मी विजयी हुन सफल भयो ।

आर्मीका आशिष बस्नेत खेलको म्यान अफ दि म्याच घोषित भए । उनले २३ स्कोर गर्नुका साथै १ असिस्ट र १ रिवाउन्ड लिएका थिए । उनले ३ हजार रुपैया पाए ।

बिहीबारै टाइम्स र गोल्डेनगेट कलेजबीचको खेल वर्षाका कारण रोकिन पुगेको थियो । खेलमा टाइम्सले अग्रता बनाएको थियो । अन्तिम क्वाटरको खेल चलिरहँदा टाइम्सले ७२–४४ को अग्रता लिएको थियो । रोकिएको खेल शुक्रबार हुनेछ ।

प्रतियोगितामा शुक्रबार एएनके कीर्तिपुर बास्केटबल टिम र बुढानिलकण्ठ तथा गोल्डेनगेट कलेज र दि रोयल बास्केटबल क्लबबीच खेल हुनेछ ।